Supreme Court Shoe Attack: “या देशात…”, सरन्यायाधीशांवरील बूट हल्ल्यावर आई कमलताई गवई यांची पहिली प्रतिक्रिया!

नेमकं काय घडलं सर्वोच्च न्यायालयात?

सोमवारी सर्वोच्च न्यायालयात सरन्यायाधीश भूषण गवई एका प्रकरणाची सुनावणी घेत असताना अचानक समोरून राकेश किशोर नावाच्या एका वकिलाने त्यांच्या दिशेनं पायातील बूट भिरकावला. यावेळी सरन्यायाधीशांसमवेत खंडपीठात दुसरे न्यायमूर्ती के. विनोद चंद्रन हेदेखील होते. हा प्रकार लक्षात येताच न्यायालयातील सुरक्षारक्षकांनी ताबडतोब राकेश किशोर यांना सरन्यायाधीशांवर बूट फेकण्यापासून अडवलं आणि न्यायालयाच्या बाहेर नेलं. यावेळी वकील राकेश किशोर हे ‘सनातन का अपमान नहीं सहेंगे’ अशा घोषणाही देत होते.

हा प्रकार घडल्यानंतर न्यायालयाच्या खोलीत गडबड उडाली. पण सरन्यायाधीश भूषण गवई यांनी यावेळी प्रसंगावधान राखत खोलीत उपस्थित सर्वांना शांतता राखण्याचं आवाहन केलं. “मला अशा गोष्टींमुळे फरक पडत नाही, तुम्हीदेखील शांत राहा”, असं सरन्यायाधीश यावेळी म्हणाले आणि त्यांनी सुनावणी पुढे सुरू केली.

सरन्यायाधीश भूषण गवई यांच्या आईची प्रतिक्रिया

दरम्यान, एकीकडे सर्वोच्च न्यायालयातील या प्रकारावर राजकीय, सामाजिक वर्तुळातून टीकात्मक प्रतिक्रिया व्यक्त होत असताना दुसरीकडे सरन्यायाधीश भूषण गवई यांच्या आई कमलताई गवई यांनी या प्रकारावर नाराजी व्यक्त केली आहे. याआधी कमलताई गवई राष्ट्रीय स्वयंसेवक संघाच्या आमंत्रणावरून त्यांच्या दसऱ्याच्या मेळाव्याला जाणार असल्याची चर्चा सुरू झाली होती. मात्र, अखेर त्यांनी संघाच्या कार्यक्रमाला जाणार नसल्याचं स्पष्ट केलं. आता सरन्यायाधीशांवरील बूट हल्ल्यावर त्यांनी दिलेली प्रतिक्रियाही चर्चेत आली आहे.

काय म्हणाल्या कमलताई गवई?

कमलताई गवई यांनी प्रसारमाध्यमांमध्ये जारी केलेल्या एका व्हिडीओच्या माध्यमातून या संपूर्ण प्रकारावर प्रतिक्रिया दिली आहे. “आपण जगा आणि इतरांनाही जगू द्या असं तत्व आहे. पण कायदा हातात घेऊन अराजकता माजवण्याचा या देशात कुणालाही अधिकार नाही. कृपया आपले प्रश्न आपण शांततेनं व संवैधानिक मार्गाने सोडवून घ्यावेत अशी मी सर्वांना विनंती करते”, असं म्हणत त्यांनी आपल्या मागण्यांसाठी घटनात्मक मार्गांचा अवलंब करण्याचं आवाहन केलं आहे.