चीनमध्ये आणखी २५ बळी; मृतांची संख्या १३२

२०१७ मध्ये वटवाघळात जे विषाणू सापडले होते तसाच आताचा विषाणू असून तो वन्य प्राण्यातून आलेला आहे.

(संग्रहित छायाचित्र)

 बीजिंग : चीनमधील घातक करोना विषाणूने घेतलेल्या बळींची संख्या १३२ झाली आहे. मध्य हुबेई प्रांतात एक दिवसात २५ जणांचा मृत्यू झाला. दरम्यान, विषाणूची लागण झालेल्या निश्चित रुग्णांची संख्या आता सहा हजार झाली असून पुढील दहा दिवसांत चीनमधील परिस्थिती अत्यंत बिकट होण्याची शक्यता आरोग्य तज्ज्ञांनी व्यक्त केली आहे.

चीनच्या अधिकाऱ्यांनी बुधवारी ५९७४ रुग्णांच्या चाचण्या सकारात्मक आल्याचे म्हटले असून त्यांना करोना विषाणूने न्यूमोनिया झाला आहे. मंगळवारी एकूण ३१ प्रांतांत या विषाणूचा प्रसार झाल्याचे दिसून आले. एकूण १३२ लोकांचा यात बळी गेला असून हुबेई प्रांतात ३५५४ निश्चित रुग्ण आहेत.  वुहान ही या प्रांताची राजधानी आहे. या प्रांतात एकूण १२५ बळी गेले आहेत. १२३९ रुग्ण गंभीर स्थितीत असून एकूण ९२३९ संशयित रुग्ण आहेत. हुबेई प्रांतात ८४० नवे रुग्ण सापडले असून विषाणू खूप वेगाने पसरत चालला आहे. जे लोक यात मरण पावले ते साठ वयावरचे आहेत. त्यांना आधीपासून इतरही काही रोग होते. मानवी संपर्कातूनही हा विषाणू पसरत असून या विषाणूचा प्रादुर्भाव दहा दिवसांत जास्त वाढणार असल्याचा इशारा श्वसन रोग तज्ज्ञ झोंग नानशान यांनी दिला आहे. चीनमध्ये स्थापन करण्यात आलेल्या राष्ट्रीय पथकाचे नानशान हे प्रमुख आहेत. लवकर निदान व वेगळे ठेवणे हे दोन मार्ग यावर सध्या उपयुक्त आहेत. ताप व अशक्तपणा ही लक्षणे या रोगात दिसत असून १० ते १४ दिवस रुग्णाला वेगळे ठेवणे गरजेचे आहे. २०१७ मध्ये वटवाघळात जे विषाणू सापडले होते तसाच आताचा विषाणू असून तो वन्य प्राण्यातून आलेला आहे. सिव्हियर अ‍ॅक्युट रेस्पिरेटरी सिंड्रोम (सार्स) हा रोग सहा महिने चालला होता पण आताचा न्यूमोनिया प्रसार तेवढा काळ राहणार नाही, असे त्यांनी सांगितले. ५५ उपमार्गावरील केंद्रात लोकांचा ताप मोजण्याची व्यवस्था करण्यात आली आहे.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

Web Title: Coronavirus claims 132 lives in china zws