पुन्हा ऑपरेशन सिंदूर होण्याची भीती; पाकिस्तानी दहशतवादी संघटनांची पळापळ, घेतला महत्त्वाचा निर्णय

पहलगाम दहशतवादी हल्ल्याला प्रत्युत्तर म्हणून, भारताने ७ मे रोजी ऑपरेशन सिंदूर सुरू राबवले होते. ज्यामध्ये पाकिस्तानच्या नियंत्रणाखालील प्रदेशातील दहशतवादी तळांना लक्ष्य केले होते. या हल्ल्यांमुळे भारत आणि पाकिस्तानमध्ये चार दिवस तीव्र लष्करी संघर्ष झाला होता.

भारतीय सुरक्षा आणि गुप्तचर संस्थांनी संयुक्तपणे तयार केलेल्या कागदपत्रानुसार, दहशतवादी संघटना पीओकेमधून बाहेर पडत आहेत, कारण भारतीय हल्ल्यांच्या दृष्टीने हा प्रदेश असुरक्षित आहे. जैश-ए-मोहम्मद आणि हिजबुल मुजाहिदीन सारख्या दहशतवादी संघटनांनी त्यांचे तळ खैबर पख्तूनख्वा येथे स्थलांतरित करण्यास सुरुवात केली आहे.

“या माहितीवरून असे दिसून येते की, दहशतवादी संघटनांकडून होणारी ही हालचाल पाकिस्तान सरकारच्या थेट सहकार्याने केली जात आहे,” असे या कागदपत्रांमध्ये म्हटले आहे.

या कागदपत्रांमध्ये पाकिस्तानातील काही ठिकाणी पोलीस संरक्षणात आयोजित करण्यात आलेल्या जैश-ए-मोहम्मदच्या मेळाव्यांचा आणि जमियत उलेमा-ए-इस्लामसारख्या राजकीय-धार्मिक संघटनांचा “मौन सहभाग” असल्याचा पुरावा म्हणून उल्लेख करण्यात आला आहे.

या कागदपत्रात मानसेहरामध्ये अलीकडेच झालेल्या दहशतवादी संघटनांतील भरतीचा उल्लेख सर्वात महत्त्वाचा आहे. या भरती मोहिमेचा उद्देश मानसेहरा येथील जैशच्या मरकज शोहदा-ए-इस्लाम म्हणून ओळखल्या जाणाऱ्या सुविधेत प्रशिक्षणासाठी लोकांना एकत्र करणे होता, असे या कागदपत्रात म्हटले आहे. यावरून असे दिसून येते की, जैशच्या प्रशिक्षण केंद्रातील बांधकामात मोठी वाढ झाली आहे.

ही भरती प्रक्रिया जैश-ए-मोहम्मद आणि जमियत उलेमा-ए-इस्लाम यांनी संयुक्तपणे राबवली होती. यामध्ये जमियत उलेमा-ए-इस्लाम प्रमुख नेता मुलाना मुफ्ती मसूद इलियास काश्मिरी उर्फ ​​अबू मोहम्मदही उपस्थित होता.

इलियास काश्मिरी हा भारतासाठी ‘मोस्ट वान्टेड’ आहे. जैश-ए-मोहम्मदचा संस्थापक मौलाना मसूद अझहरशी त्याचे जवळचे संबंध आहेत.