इस्लामाबाद : पाकिस्तानातील सर्वोच्च न्यायालयाने हिंसाचार प्रकरणात माजी पंतप्रधान इम्रान खान यांना गुरुवारी जामीन मंजूर केला. हिंसाचाराची ही घटना ९ मे २०२३ रोजी घडली होती. इम्रान खान यांना अटक करण्यात आल्यानंतर त्यांच्या समर्थकांनी मोडतोड व जाळपोळ केली होती.
या हिंसाचारात कथित भूमिकेसंदर्भात इम्रान खान आणि त्यांच्या पाकिस्तान तेहरीक ए इन्साफ (पीटीआय) या पक्षाच्या अनेक नेत्यांविरोधात खटले दाखल करण्यात आले होते.
सर्वोच्च न्यायालयाच्या त्रि-सदस्यीय खंडपीठाने त्यांचे वकील सलमान सफदर आणि राज्याचे प्रतिनिधित्व करणारे पंजाबचे विशेष वकील झुल्फिकार नक्वी यांचा युक्तिवाद ऐकल्यानंतर खान यांना जामीन मंजूर केला.
मुख्य न्यायाधीश अफ्रीदी यांच्या नेतृत्वातील या खंडपीठात न्यायमूर्ती शफी सिद्दिकी आणि मियांगुल औरंगजेब यांचा समावेश होता. दरम्यान, तुरुंगातून बाहेर येण्यासाठी इम्रान खान यांना आता अल कादिर प्रकरणात जामीन आवश्यक असल्याची माहिती पक्षाचे आंतरराष्ट्रीय प्रवक्ते झुल्फीकार बुखारी म्हणाले. इम्रान खान ऑगस्ट २०२३ पासून रावळपिंडी तुरुंगात आहेत.
