Operation Sindoor Logo: ऑपरेशन सिंदूरचा लोगो कुणी तयार केला माहितीये? लष्कराच्या बुकलेटमध्ये दोन अधिकाऱ्यांची नावे!

या मोहिमेला दिलेल्या ‘ऑपरेशन सिंदूर’ नावाला पंतप्रधान नरेंद्र मोदींनी मंजुरी दिली होती. इंडियन एक्स्प्रेसनं सरकारमधील सूत्रांच्या हवाल्याने दिलेल्या वृत्तानुसार, पहलगाम हल्ल्यात फक्त पुरुषांना लक्ष्य करण्यात आल्यानंतर आपल्या पतीला गमावलेल्या महिलांच्या भावना व्यक्त करण्यासाठी हे नाव निश्चित करण्यात आलं होतं. त्यामुळे नावाला साजेसाच लोगो असणं महत्त्वाचं होतं.

आत्तापर्यंत भारतानं राबवलेल्या जवळपास सर्वच लष्करी मोहिमांना लष्कराशीच संबंधित नावं देण्यात आली होती. आपल्या लष्कराचा आत्मविश्वास वाढवण्यासाठी आणि शत्रूला आपल्या सामर्थ्याचा संदेश देण्यासाठी हे केलं जात होतं. काही वेळा मोहिमेबाबतची माहिती गुप्त ठेवण्यासाठीदेखील विशिष्ट प्रकारची नावं निवडली जात होती. काही नावं भारतीय दंतकथांमधूनही निवडली जात होती.

भारतीय लष्करातील दोन नावं…

दरम्यान, ऑपरेशन सिंदूर नाव निश्चित झाल्यानंतर त्याचा लोगो तयार करण्याचं काम भारतीय लष्करातील दोन व्यक्तींनी हाती घेतलं. त्यातले एक आहेत लेफ्टनंट कर्नल हर्ष गुप्ता तर दुसरे आहेत हवालदार सुरिंदर सिंग! या दोघांनी मिळून बनवलेला ऑपरेशन सिंदूरचा लोगो अवघ्या जगभरात चर्चेचा विषय बनला. या डिझाईनमध्ये पूर्णपणे काळ्या पार्श्वभूमीवर मोठ्या अक्षरांमध्ये Operation Sindoor असं लिहिण्यात आलं आहे. यातील Sindoor शब्दामधील एका O अक्षरातून लाल रंगाचं कुंकू सांडल्याचं दाखवण्यात आलं आहे. यातून पहलगाम हल्ल्यात पती गमावलेल्या महिलांच्या वेदना व्यक्त करण्यात आल्या आहेत.

पंतप्रधान नरेंद्र मोदींचा पाकिस्तानला इशारा

दरम्यान, गेल्या आठवड्यात पंतप्रधान नरेंद्र मोदींनी ऑपरेशन सिंदूरचा उल्लेख करत एका भाषणातून पाकिस्तानला थेट इशारा दिला होता. “माझं डोकं थंड आहे, थंडच असतं, पण माझं रक्त तापतं. आणि आता तर माझ्या नसांमध्ये रक्त नाही, तर तापलेलं सिंदूर वाहात आहे”, असं मोदी म्हणाले होते. त्यातून हे नाव आणि यातील O अक्षरातून सांडलेलं कुंकू याची यथार्थथाच स्पष्ट होत असल्याचं सांगितलं जात आहे.