Jagdeep Dhankhar Non-Bulletproof Innova: गेल्या वर्षी फेब्रुवारीमध्ये उपराष्ट्रपती सचिवालयाने तत्कालीन उपराष्ट्रपती जगदीप धनखड यांच्या तीन उच्च-सुरक्षा बीएमडब्ल्यू कार जुन्या झाल्याचा हवाला देत, त्यांच्यासाठी नवीन बुलेटप्रूफ वाहनांची मागणी केली होती. यानंतर गृह मंत्रालयाने जूनमध्ये कळवले की, याची चौकशी करण्यासाठी एक मंडळ स्थापन केले जाईल. परंतु नोव्हेंबरमध्ये उपराष्ट्रपतींच्या कार्यालयाने नॉन-बुलेटप्रूफ इनोव्हा घेण्याचा निर्णय घेतला आणि ते तेव्हापासून राजीनामा देईपर्यंत त्यामध्येच प्रवास करत होते. याबाबत द इंडियन एक्सप्रेसने वृत्त दिले आहे.
दरम्यान, जगदीप धनखड यांनी २२ जुलै रोजी आरोग्याच्या कारणास्तव उपराष्ट्रपती पदावरून पायउतार होत असल्याची घोषणा केली होती. सूत्रांनी दिलेल्या माहितीनुसार, गेल्या वर्षी २८ फेब्रुवारी रोजी उपराष्ट्रपती सचिवालयाकडून गृह मंत्रालयाच्या अतिरिक्त सचिवांना (पोलीस आधुनिकीकरण विभाग) त्यांच्या अधिकृत वाहनांच्या स्थितीबद्दल एक पत्र पाठवण्यात आले होते.
उपराष्ट्रपती सचिवालयातील तत्कालीन उपसचिवांनी त्यांच्या पत्रव्यवहारात लिहिले होते की, “मला तुम्हाला कळवण्याचे निर्देश देण्यात आले आहेत की, भारताचे माननीय उपराष्ट्रपती त्यांच्या दैनंदिन प्रवासादरम्यान वापरण्यासाठी तीन बुलेटप्रूफ बीएमडब्ल्यू हाय-सिक्युरिटी वाहने वापरतात. तीन वाहनांपैकी दोन वाहने सहा वर्षांपेक्षा जास्त जुनी झाली आहेत, तर तिसरे वाहन जवळजवळ चार वर्षे आणि पाच महिने जुने आहे, जे पुढील काही महिन्यांत पाच वर्षांपेक्षा जास्त जुने होईल.”
“या तिन्ही वाहनांच्या जागी नवीन तीन बुलेटप्रूफ हाय-सुरक्षा असलेली वाहने घेण्याचे निर्देश देण्यात आले आहेत. तीन वाहने लवकरात लवकर बदलण्याची प्रक्रिया सुरू करण्याची विनंती करण्यात आली आहे”, असे त्यात पुढे म्हटले होते.
सूत्रांनी दिलेल्या माहितीनुसार, यापूर्वीही दिल्ली पोलिसांच्या सुरक्षा विभागाला असेच एक पत्र पाठवण्यात आले होते, ज्यामध्ये स्पष्ट करण्यात आले होते की वाहनांची खरेदी गृह मंत्रालयाद्वारे केली जाते.
२८ फेब्रुवारीच्या पत्राला उत्तर देताना, गृह मंत्रालयातील एका सचिवाने १२ जून २०२४ रोजी उपराष्ट्रपती सचिवालयाला लिहिले की, “ते उपराष्ट्रपतींच्या तीन्ही वाहनांची तपासणी करण्यासाठी अधिकाऱ्यांचे एक मंडळ तयार करत आहेत. यासाठी त्यांनी सहा अधिकाऱ्यांची नियुक्ती केली आहे, ज्यात एनएसजीचे दोन आणि सीआरपीएफचा एक अधिकारी आहे. हे सर्व अधिकारी बुलेटप्रूफ वाहनांशी संबंधित तांत्रिक बाबींमध्ये जाणकार आहेत.”
उपराष्ट्रपतींना दिल्ली पोलिसांचे ‘झेड प्लस’ सुरक्षा कवच दिले जाते. २८ नोव्हेंबर रोजी दिल्ली पोलिसांनी जारी केलेल्या अंतर्गत पत्रकात म्हटले होते की, उपराष्ट्रपतींच्या सचिवालयाने धनखड यांच्या बुलेटप्रूफ वाहनांची पाच वर्षांची मुदत संपल्यामुळे वाहने बदलली आहेत. नवीन वाहन इनोव्हा आहे, तर अतिरिक्त वाहन फॉर्च्युनर आहे, आणि दोन्हीही वाहने बुलेटप्रूफ नाहीत, असे त्यात नमूद करण्यात आले आहे.
दरम्यान, उपराष्ट्रपतींचे ओएसडी आणि सचिव यांना सांगण्यात आले होते की ही वाहने बुलेटप्रूफ नाहीत, आणि गरज पडल्यास अशी वाहने दिल्ली पोलिसांकडून मागवता येतील, परंतु ती नाकारण्यात आली.
