बहुजन समाज पार्टीच्या सर्वेसर्वा मायावती आज  दिल्लीत विरोधी पक्ष नेत्यांबरोबर कोणतीही बैठक करणार नाहीत. असे पक्षाच्यावतीने सांगण्यात आले आहे.

मायावती आज (सोमवारी) विरोधी पक्ष नेत्यांबरोबर बैठक करणार असल्याच्या बातमीनंतर बसपाकडून ही माहिती देण्यात आली. बसपा नेते सतिशचंद्र मिश्रा यांनी एएनआयला ही माहिती दिली आहे. याअगोदर काही माध्यमांनी  २३ मे रोजी असलेल्या लोकसभा निवडणूक निकालाच्या पार्श्वभूमीवर मायावती दिल्लीत ‘यूपीए’च्या अध्यक्ष  सोनिया गांधी, काँग्रेस अध्यक्ष राहूल गांधी यांच्याबरोबर बैठक करणार असल्याची बातमी दिली होती.

आंध्रप्रदेशचे मुख्यमंत्री चंद्रबाबू नायडू यांनी लखनऊ येथे शनिवारी मायावतींची भेट घेतली होती. यानंतर रविवारी विविध माध्यमांचे देशभरातील निवडणुकांनतरचे एक्झिट पोल जाहीर झाले. ज्यामध्ये केंद्राची सत्ता पुन्हा एनडीए प्रणीत भाजपा सरकारकडेच जाणार असल्याचे दाखवले गेल्याने, नव्या राजकीय डावपेचांना सुरूवात झाल्याचे दिसत आहे.