Waqf Bill Controversy: “अलविदा नितीश कुमार..”, वक्फ विधेयक मंजूर होताच नितीश कुमारांच्या पक्षात बंडखोरी; नाराज नेत्यांचे राजीनामे

जेडीयूच्या नदीम अख्तर यांनी नुकताच राजीनामा दिला आहे. त्यांच्या आधी राजू नय्यर, तबरेज सिद्दीकी अलीग, मोहम्मद शाहनवाझ मलिक आणि मोहम्मद कासीम अन्सारी यांनी राजीनामा दिला होता. नदीम राजू आणि तबरेज या नेत्यांनी आज तर शाहनवाज आणि मोहम्मद कासीम अन्सारी यांनी कालच (गुरूवारी) राजीनामा दिला होता.

राजू नय्यर यांनी राजीनामा पत्रात लिहिले की, जेडीयूने वक्फ विधेयक मंजूर करण्यासाठी सभागृहात पाठिंबा दिल्यामुळे मी राजीनामा देत आहे. मुस्लिमांच्या विरोधात असलेल्या या काळ्या कायद्याला पक्षाने पाठिंबा दिल्यामुळे मला अतीव दुःख होत आहे. मी माझ्या सर्व पदांचा आणि प्राथमिक सदस्यत्वाचा राजीनामा देत आहे. मला सर्व जबाबदाऱ्यांमधून मुक्त करण्यात यावे.

जेडीयू नेते शाहनवाज मलिक यांनी आपल्या राजीनाम पत्रात लिहिले की, माझ्यासारख्या लाखो मुस्लिमांना तुमच्यावर विश्वास होता. तुम्ही धर्मनिरपेक्ष विचारधारे जपणारे खरे नेते आहात, असे वाटत होते. मात्र त्या विश्वासाला आता तडा गेला आहे. तर तबरेज सिद्दीकी अलीग म्हणाले की, जेडीयू पक्षाने मुस्लीम समाजाचा विश्वासघात केला आहे.