स्वयंसेवकाच्या आत्महत्येप्रकरणी आरोपांचे संघाकडून खंडन

अजि हा संघाचा स्वयंसेवक होता. त्याचा मृतदेह कोट्टायम जिल्ह्यातील एका हॉटेलमध्ये आढळला होता. त्याच्या खोलीत सापडलेल्या चिठ्ठीमध्ये, संघामध्ये अनेक वर्षांपासून आपले लैंगिक शोषण करण्यात आले असा आरोप करण्यात आला होता. या प्रकरणावरून समाजमाध्यमांवरही बरीच चर्चा झाली. तसेच काँग्रेस नेत्यांनी अजिने कथितरित्या केलेल्या आरोपांच्या चौकशीची मागणी केली.

संघाने प्रसृत केलेल्या निवेदनात नमूद करण्यात आले आहे की, “आनंदु अजिचा अनैसर्गिक मृत्यू दुःखद आणि दुर्दैवी आहे. समाजमाध्यमांवर प्रसिद्ध झालेल्या चिठ्ठीमध्ये संघाविरोधात काही संशयास्पद आणि निराधार आरोप करण्यात आले आहेत. आम्ही जिल्हा पोलिसांकडे लेखी याचिका करून अजिच्या मृत्यूची सखोल आणि निष्पक्ष चौकशीची मागणी करतो.”