वगळलेल्या मतदारांचे तपशील द्या! सर्वोच्च न्यायालयाचे निवडणूक आयोगाला निर्देश

‘एसआयआर’च्या पहिल्या टप्प्यानंतर १ ऑगस्टला मसुदा यादी प्रसिद्ध केल्यानंतर त्यामध्ये जोडलेली बहुसंख्य नवीन नावे ही नव्या मतदारांची आहेत. मतदार वगळल्याबद्दल आतापर्यंत कोणतीही तक्रार किंवा अपील दाखल करण्यात आलेले नाही असे निवडणूक आयोगाने सर्वोच्च न्यायालयाला सांगितले. त्यानंतर, वगळलेल्या मतदारांबाबत निवडणूक आयोगाकडे जी काही माहिती असेल ती त्यांनी गुरुवारी द्यावी, असे निर्देश सर्वोच्च न्यायालयाने दिले. आयोगाची बाजू अॅड. राकेश द्विवेदी यांनी तर प्रशांत भूषण आणि अभिषेक मनु सिंघवी यांनी याचिकाकर्त्यांची बाजू मांडली.

मतदारयादी प्रक्रियेतील पारदर्शकता आणि उपलब्धता वाढली आहे. ज्या कोणाची नावे वगळली गेली आहेत, त्यांची नावे तुमच्या निवडणूक कार्यालयांमध्ये उपलब्ध करून द्या. तुमच्याकडे मसुदा मतदारयादी आहे आणि ३० सप्टेंबरला अंतिम मतदारयादी प्रसिद्ध झाली आहे. त्यामुळे तुलनात्मक विश्लेषण करून आवश्यक डेटा मिळवता येईल. – न्या. जॉयमाल्या बागची

एक लाख ‘सीएपीएफ’ची तैनातीची तयारी

बिहार निवडणुकीसाठी केंद्रीय सशस्त्र पोलीस दलाचे (सीएपीएफ) जवळपास एक लाख जवान तैनात केले जाण्याची शक्यता आहे, अशी माहिती अधिकाऱ्यांनी मंगळवारी दिली. राज्यात मुक्त, निष्पक्ष आणि शांततापूर्वक निवडणुका घेण्यासाठी निवडणूक आयोग तयारी करत आहे, असे त्यांनी सांगितले.