स्वतंत्र तेलंगणाविरोधात सीमांध्रमध्ये कडकडीत बंद

स्वतंत्र तेलंगणाच्या विधेयकाला लोकसभेने संमती दिल्याच्या पार्श्वभूमीवर संपूर्ण आंध्रप्रदेशचे वातावरण सध्या ढवळून निघाले आहे. आंध्र प्रदेशातील सीमांध्र भागात अखंड तेलंगणा समर्थक आणि इतर राजकीय पक्षांनी कडकडीत बंद पुकारला आहे.
बंदला उस्फुर्त प्रतिसाद मिळत असून पूर्व गोदावरी जिल्हा परिसरातील गोकावराम येथील भाजप कार्यालयाची अखंड तेलंगणा समर्थकांनी तोडफोड केली आहे. रायलसीमा आणि सीमांध्र भागातील वेगवेगळ्या जिल्ह्यांमध्ये बंद तीव्रतेने पाळण्यात आला असून परिस्थिती पाहता कायदा आणि सुव्यवस्थेचा प्रश्न निर्माण होऊ नये म्हणून मोठ्या प्रमाणावर पोलीस बंदोबस्त ठेवण्यात आला आहे. दुसऱया बाजूला सोनिया आणि राहुल गांधी यांचे पोस्टर्स जाळून स्वतंत्र तेलंगणाच्या विधेयकाचा निषेध व्यक्त करण्यासाठी शेकडो कार्यकर्ते रस्त्यावर उतरले आहेत. बंदमुळे शाळा, वाहतुक सेवा, खासगी कार्यालये आणि इतर कामकाज ठप्प झाले आहे. काही ठिकाणी तणावपूर्ण परिस्थिती निर्माण होण्याची चिन्हे आहेत.