पठाणकोट हल्ल्यातील दहशतवाद्यांनाही पाकिस्तानने तातडीने शिक्षा करावी

अमेरिकेची अपेक्षा
पाकिस्तानने पठाणकोट हल्ला २६/११ इतकाच महत्त्वाचा समजून त्यातील गुन्हेगारांना शिक्षा करावी असे अमेरिकेने म्हटले आहे. अमेरिकेचे अध्यक्ष ओबामा यांनी पाकिस्तानला असा इशारा दिला, की जैश ए महंमद, लष्कर ए तोयबा व डी कंपनी यांनी भारताविरोधात ज्या कारवाया केल्या आहेत, त्यातील संबंधितांना शिक्षा होण्याकरिता पाकिस्तानने प्रयत्न करणे गरजेचे आहे.
ओबामा-मोदी यांच्या भेटीनंतर संयुक्त निवेदनात म्हटले आहे, की पाकिस्तानने मुंबईतील २००८चा हल्ला, तर पठाणकोटमधील अलीकडचा हल्ला यात जबाबदार असणाऱ्या दहशतवाद्यांना शिक्षा करावी.
या बैठकीत मोदी व ओबामा यांनी मानवी संस्कृतीला दहशतवादाचा असलेला धोका कायम असल्याचे मान्य केले. त्यात पॅरिस ते पठाणकोट, ब्रसेल्स ते काबूल या हल्ल्यांचा या वेळी निषेध करण्यात आला. जगातील दहशतवाद्यांना होणारा अर्थपुरवठा व पायाभूत सुविधांचा मिळणारा लाभ बंद करण्याचा निश्चय करण्यात आला.
दाएश-आयसिस, अल कायदा, लष्कर ए तोयबा, डी कंपनी यांच्यावर कारवाईसाठी संयुक्त राष्ट्र संघटनेच्या सहकार्याने एकजूट करण्याचे ठरवल्याचे ओबामा व मोदी यांनी स्पष्ट केले. अमेरिका-भारत यांच्यात दहशतवादविरोधी कार्यकारी गटाची पुढील बैठक होणार आहे त्या वेळी अधिकाऱ्यांनी कुठल्या बाबतीत सहकार्य करणे शक्य आहे याची तपासणी करावी असे आदेश दोन्ही नेत्यांनी त्यांच्या अधिकाऱ्यांना दिले. नागरी समुदाय व अल्पसंख्याक समाज यांना दहशतवादासारख्या प्रश्नावर व्यापक उपाययोजना करताना विश्वासात घ्यावे असे मत दोन्ही नेत्यांनी व्यक्त केले आहे.