Vice Presidential Election : उपराष्ट्रपती पदासाठी एनडीएच्या उमेदवाराची आज घोषणा होणार? दिल्लीत घडामोडींना वेग, कोणाची नावे चर्चेत? वाचा!

उपराष्ट्रपती पदासाठी आज एनडीएच्या उमेदवाराची दिल्लीत घोषणा होण्याची शक्यता आहे. भाजपाच्या नेतृत्वाखालील राष्ट्रीय लोकशाही आघाडीने (एनडीए) पंतप्रधान नरेंद्र मोदी आणि भाजपाचे अध्यक्ष जे.पी. नड्डा यांना एनडीएचा उमेदवार निवडण्याचे अधिकार दिल्याचं बोललं जात आहे. या अनुषंगाने भारतीय जनता पक्षाच्या संसदीय मंडळाची आज एक महत्वाची बैठक होणार आहे. या बैठकीत उपराष्ट्रपती पदाच्या निवडणुकीसाठी एनडीएचा उमेदवार निश्चित करण्यात येणार असल्याची चर्चा आहे. या संदर्भातील वृत्त एएनआयच्या हवाल्याने मनी कंट्रोलने दिलं आहे.

निवडणूक आयोगाने ९ सप्टेंबर रोजी उपराष्ट्रपती पदाची निवडणूक जाहीर केल्यानंतर आता एनडीएच्या उमेदवाराची आज घोषणा होण्याची शक्यता आहे. मात्र, त्याआधी उपराष्ट्रपती पदासाठी काही नावांची मोठ्या प्रमाणात चर्चा होत आहे. यामध्ये एनडीटीव्हीने सूत्रांच्या हवाल्याने दिलेल्या एका वृत्तानुसार, गुजरातचे राज्यपाल आचार्य देवव्रत, कर्नाटकचे राज्यपाल थावरचंद गेहलोत, सिक्कीमचे राज्यपाल ओम माथूर आणि जम्मू आणि काश्मीरचे उपराज्यपाल मनोज सिन्हा यांच्या नावांची चर्चा आहे. मात्र, अद्याप अधिकृत कोणाच्याही नावाची घोषणा झालेली नाही. त्यामुळे कोणाच्या नावाची घोषणा होते? याकडे अवघ्या देशाचं लक्ष लागलं आहे.

दरम्यान, गेल्या एका महिन्यात अनेक राज्यपाल आणि उपराज्यपालांनी पंतप्रधान नरेंद्र मोदी, गृहमंत्री अमित शाह आणि संरक्षण मंत्री राजनाथ सिंह यांची भेट घेतल्याची चर्चा असल्याचं वृत्तात म्हटलं आहे. तसेच आगामी बिहार निवडणुका लक्षात घेऊन राज्यसभेचे विद्यमान उपसभापती हरिवंश यांचाही विचार केला जाऊ शकतो.

उपराष्ट्रपती पदाच्या निवडणुकीचं वेळापत्रक कसं आहे?

-नामांकन अर्ज दाखल करण्याची अंतिम तारीख २१ ऑगस्ट २०२५ असेल.

-नामांकन अर्ज छाननीची तारीख २२ ऑगस्ट २०२५ असेल.

-उमेदवारी मागे घेण्याची अंतिम तारीख २५ ऑगस्ट २०२५ असेल.

-मतदानाची तारीख ९ सप्टेंबर २०२५ असेल आणि त्यानंतर मतमोजणी होईल.

जगदीप धनखड यांनी का दिला राजीनामा?

संसदेच्या पावसाळी अधिवेशनाच्या पहिल्या दिवशीच जगदीप धनखड यांनी आपल्या पदाचा राजीनामा दिला होता. खरं तर धनखड यांनी प्रकृतीच्या कारणास्तव राजीनामा देण्याचा निर्णय घेतल्याचं सांगितलं असलं तरी त्यांच्या राजीनाम्यावरून राजकीय वर्तुळात वेगवेगळ्या चर्चा सुरू आहेत. जगदीप धनखड यांनी स्वत:हून राजीनामा दिला की त्यांना राजीनामा द्यायला लावला? असे अनेक सवाल विरोधकांकडून विचारले जात आहेत.