१० वर्षांच्या एका मुलीवर तिच्या आईच्या मित्राने अनेकदा बलात्कार केला. ही बाब लपवण्यासाठी आई या मुलीचा छळ करत होती आणि तिला वेश्या व्यवसायात ढकलू पाहात होती. मात्र ही मुलगी घरातून पळून गेली. ही मुलगी रस्त्यात एकटीच भटक होती त्यामुळे पोलिसांनी तिला ताब्यात घेतलं आणि तिची चौकशी केली. त्यानंतर पोलिसांना तिने हा सगळा प्रकार सांगितला. ज्यानंतर या मुलीची वैद्यकीय चाचणी करण्यात आली. या मुलीला बाल कल्याण समितीने आता आसरा दिला आहे. तिच्या वैद्यकीय तपासणीत तिच्यावर अनेकदा बलात्कार झाल्याची बाब उघड झाली आहे.
कुठे घडली ही घटना?
गाझियाबाद या ठिकाणी ही घटना घडली आहे. गाझियाबादच्या लोनी या ठिकाणी हा सगळा प्रकार घडला. या मुलीने सांगितलं की तिच्या आईचा मित्र घरात येऊन तिच्यावर बलात्कार करत होता. तसंच तो माझ्या १३ वर्षांच्या भावाचाही लैंगिक छळ करत होता. त्यामुळे माझ्या भावानेही घर सोडून दिलं. तसंच हा सगळा प्रकार माझ्या आईला ठाऊक आहे तिने मला वेश्या व्यवसायात ढकलण्याचा प्रयत्न केला असं या मुलीने सांगितलं.
पोलिसांनी काय म्हटलं आहे?
पोलिसांनी या सगळ्या प्रकारानंतर पीडित मुलीच्या आईला आणि तिच्या मित्राला अटक केली आहे. सहाय्यक पोलीस आयुक्त भास्कर शर्मा यांनी सांगितलं की, “ही मुलगी घरातून पळून आली होती आणि रस्त्यावर भटकत होती. तिला ताब्यात घेतल्यावर आम्हाला सगळा प्रकार कळला. या मुलीने राजू नावाचा इसम तिच्यावर बलात्कार करत होता असं सांगितलं. त्याला आणि मुलीच्या आईला अटक करण्यात आली आहे. ही मुलगी इतकी घाबरली होती की सुरुवातीला तिने सांगितलं माझ्या सावत्र वडिलांनी माझ्यावर बलात्कार केला. मुलीने आम्हाला हेदेखील सांगितलं की माझ्या वडिलांच्या निधनानंतर आई शरीरविक्रय करत होती. तिला वाटत होतं की मी पण त्याच व्यवसायात यावं.” एनडीटीव्हीने याबद्दलचं वृत्त दिलं आहे.
