“मध्य प्रदेश अन् राजस्थानमधील भाजपाला मिळालेलं यश मोदी किंवा शाहांचं नाही, तर…”, संजय राऊतांचं विधान

प्रसारमाध्यमांशी संवाद साधताना संजय राऊत म्हणाले, “पाचही राज्यात आपलं सरकार येईल, हा भाजपाचा दावा एक विनोद म्हणून घ्यायला हवा. मिझोरामध्ये भाजपा कुठे औषधालाही दिसत नाही. तेलंगणात भाजपा चौथ्या क्रमांकाला आहे. तेलंगणात भाजपाला १० जागाही मिळण्याची शक्यता नाही. छत्तीसगडमध्ये काँग्रेसचं सरकार येणार आहे.”

“मध्य प्रदेश आणि राजस्थानमध्ये काँग्रेस-भाजपा जोरदार लढाई आहे. मध्य प्रदेश आणि राजस्थानमध्ये भाजपाला यश मिळालं, तर त्याचं श्रेय मोदी किंवा शाहांचं नसेल. तर, मध्य प्रदेशात शिवराज सिंह चौहान आणि राजस्थानमध्ये वसुंधरा राजे शिंदे यांचं श्रेय असेल,” असं संजय राऊतांनी म्हटलं.

दरम्यान, छत्तीसगडमध्ये भाजपा ४० तर काँग्रेस ३६ जागांवर आघाडीवर आहे. तर, तेलंगणात काँग्रेस ५४ आणि भारत राष्ट्र समिती ( बीआरएस ) ३३ आणि भाजपाचे ७ उमेदवार आघाडीवर आहेत. मध्य प्रदेशात भाजपा १४९ तर काँग्रेस ६२ आघाडीवर असल्याचं दिसत आहे. राजस्थानमध्ये काँग्रेसला मोठा धक्का बसला आहे. भाजपा १०० तर काँग्रेस ७८ जागांवर आघाडीवर आहे.