गणेशोत्सव हा संपूर्ण देशभरामध्ये उत्साहात साजरा केला जात आहे. ढोल-ताशाच्या गजरामध्ये, वाजत गाजत उत्साह अन् जल्लोषामध्ये बाप्पाचे घरोघरी आगमण होते. मुंबई -पुण्यामध्ये मानाच्या आणि प्रसिद्ध गणपतींची प्राणप्रतिष्ठा झाली आहे. पुणेकरांच्या लाडका बाप्पा म्हणजे दगडूशेठ गणपतीच्या दर्शनासाठी बाप्पाची मोठी गर्दी होत आहे. यंदा श्रीमंत दगडूशेठ हलवाई सार्वजनिक गणपती ट्रस्टने पद्मनाभन मंदिराचा देखावा केला आहे. लाखो भाविक बाप्पाचे दर्शन घेत आहे आणि हा देखावा पाहण्यासाठी गर्दी करत आहेत. याचबरोबर दरवर्षीप्रमाणे यंदाही हजारो महिलांना दगडूशेठ गणपतीसमोर अर्थवशीर्षपठण केले.
दगडूशेठ गणपतीसमोर तब्बल ३५ हजार महिलांनी केले अथर्वशीर्ष पठण
ओम गं गणपतये नमः:… ओम नमस्ते गणपतये… मोरया, मोरया…च्या जयघोष करत दरवर्षीप्रमाणे यंदाही तब्बल ३५ हजार महिलांनी एकत्र येत अथर्वशीर्ष पठण करून गणरायाला नमन केले. गणरायाच्या नामाचा जयघोष करीत ॠषीपंचमीनिमित्त आयोजित या सोहळ्यात हजारो महिला उपस्थित होत्या. उर्जेने भारलेल्या वातावरणामध्ये हा सोहळा पार पडला. अथर्वशीर्षासह महाआरती आणि गणरायाचा गजर करीत महिलांनी ‘स्त्री शक्तीचा जागर’ केला.
श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळ च्यावतीने ट्रस्टच्या १३३ व्या वर्षीच्या गणेशोत्सवात उत्सव मंडपासमोर आयोजित अथर्वशीर्ष पठण सोहळ्याचे आयोजन करण्यात आला होता. पाऊस पडत असतानाही अनेक महिलांना पारंपरिक वेशात मध्यरात्री २ वाजल्यापासू या उपक्रमाकरीता हजेरी लावण्यास सुरुवात केली. या उपक्रमाचे हे ४० वे वर्ष होते.
येथे पाहा अथर्वशीर्ष पठणांचा व्हिडीओ
असा पार पडला अथर्वशीर्ष पठण सोहळा
शंखनादाने सोहळ्याची सुरवात झाली, त्यानंतर ओंकारचा जप करत मन शांत केले. “गजानना गजानना मंगलमूर्ती गजानना” गायनाने सर्व वातावरण मंत्रमुग्ध झाले. महिलांनी मुख्य अथर्वशीर्ष पठण करीत गणरायाला नमन केले. मोरया मोरया दगडूशेठ मोरया… असा गणेश नामाचा गजर करताना प्रत्येक महिलेच्या चेहऱ्यावरील उत्साह ओसंडून वाहत होता. दगडूशेठच्या उत्सव मंडपापासून ते नाना वाडयापर्यंतच्या परिसरात महिलांनी अथर्वशीर्ष पठणाकरीता गर्दी केली. भक्तीरसात तल्लीन झालेल्या वातावरणात कार्यक्रमाची सांगता आरतीने झाली. महिला हात उंचावून टाळ्यांचा गजर करीत गणरायाला नमन करीत होत्या. हे दृश्य पाहून अनेकांच्या अंगावर काटा उभा राहिला.
