कोल्हापूर : गोव्यातील नागरिक, पर्यटकांना गोकुळच्या उत्पादनांचा लाभ मिळावा यासाठी गोवा दूध महासंघ आणि गोकुळ यांच्यामार्फत काही संयुक्त कार्यक्रम राबविण्यात येतील. त्यास शासनाच्या वतीने सहकार्य, मार्गदर्शन निश्चित केले जाईल, असे आश्वासन गोव्याचे मुख्यमंत्री डॉ. प्रमोद सावंत यांनी दिले.
कोल्हापूर जिल्हा सहकारी दूध उत्पादक संघाचे (गोकुळ) अध्यक्ष नविद मुश्रीफ, संचालक मंडळ यांनी गोवा राज्याचे मुख्यमंत्री डॉ. सावंत यांची पणजी येथील मुख्यमंत्री निवासस्थानी सदिच्छा भेट घेतली. यावेळी गोकुळच्यावतीने मुख्यमंत्री सावंत यांचा कोल्हापूरची श्री महालक्ष्मी देवीची प्रतिमा, पुष्पगुच्छ, गोकुळची दुग्ध उत्पादने देऊन सत्कार करण्यात आला. या चर्चेत गोकुळ व गोवा मिल्क फेडरेशन यांच्या संयुक्त विद्यमाने गोवा राज्यात गाय दुधाचे मूल्यवर्धित दूध आणि दुग्धजन्य पदार्थांचा दर्जेदार व स्थिर पुरवठा ग्राहकांना उपलब्ध करून देण्याबाबत सहकार्याची रूपरेषा तयार करण्यासंबंधी चर्चा करण्यात आली.
सद्यःस्थितीत गोव्यात दुग्धजन्य पदार्थांची मागणी मोठ्या प्रमाणात असून, त्या तुलनेत नियमित व गुणवत्तापूर्ण पुरवठा मर्यादित आहे. त्यामुळे गोकुळसारख्या गुणवत्ताधिष्ठित संस्थेच्या सहकार्याने ही तफावत भरून काढली जाऊ शकते, असा विश्वास यावेळी व्यक्त करण्यात आला.
नविद मुश्रीफ म्हणाले, गोव्यासारख्या प्रगत आणि जागरूक राज्यात गोकुळचे उत्पादने पोहोचवणे ही केवळ व्यावसायिक संधी नसून, गुणवत्तेची बांधिलकीही आहे. गोवा राज्य शासनाने दिलेले सहकार्य आम्हाला अधिक प्रेरणा देणारे आहे.
