‘गोकुळ’च्या कपाती विरोधात उद्या जनावरासहित मोर्चा

पाटील, काटे यांनी सांगितले की, गोकुळने (कोल्हापूर जिल्हा बिग उत्पादक संघ) वार्षिक सभेत कपातीचा निर्णय न घेता परस्पर अंमलबजावणी केली जात आहे. डिबेंचर कपात केल्याने प्राथमिक दूध संघांवर दंडात्मक कारवाई होऊ शकते. शिवाय संचालक मंडळ बरखास्त करण्याची कारवाई सुद्धा होऊ शकते. दिवाळीच्या पार्श्वभूमीवर कपात केल्याने सामान्य दूध उत्पादक शेतकऱ्यांचा अकारण रोष पत्करावा लागत आहे. याच्या विरोधात हा मोर्चा कोल्हापुरात निघणार आहे.

कोल्हापूर जिल्हा दूध उत्पादक संघाने (गोकुळ) प्राथमिक दूध संस्थांना डीबेंचर स्वरूपात याही वर्षी भरघोस रक्कम देण्याचा निर्णय जाहीर केला आहे. ही घोषणा फसवी असून या रकमेमध्ये गतवर्षी पेक्षा ४० टक्के रक्कम कपात केली असल्याचा आरोप दूध संस्थांकडून केला जात आहे. याबाबत आठ दिवसापूर्वी विरोधी गटाच्या संचालिका शौमिका महाडिक यांच्यासह संस्था प्रतिनिधींनी गोकुळचे कार्यकारी संचालक डॉ. योगेश गोडबोले यांना घेराव घालून विचारणा केली होती. याच मागणीसाठी गोकुळ जिल्हा दूध उत्पादक संस्था प्रतिनिधींच्या वतीने गोकुळच्या ताराबाई पार्क कार्यालय समोर उपोषण केले होते.

यामध्ये कोल्हापूर जिल्हा दूध उत्पादक संघटनेचे जिल्हाध्यक्ष जोतीराम घोडके, कोल्हापूर जिल्हा शेतकरी संघटनेचे जिल्हाध्यक्ष एड. माणिक शिंदे, चंद्रशेखर मस्के, बाबासाहेब गोसावी, पांडुरंग मगदूम, अनिल कुरणे, अनिल जाधव यांच्यासह संस्था प्रतिनिधी सहभागी झाले होते. यावेळी गोकुळने पशुखाद्य दर वाढ मागे घ्यावी, गाय दुधात प्रति लिटर ७ रुपये प्रमाणे केलेली कपात मागे घ्यावी, शासनाकडून मिळालेले ४१ कोटी रुपये अनुदानातील अडचणी दूर कराव्यात आदी मागण्या करण्यात आल्या होत्या.

गोकुळ दूध संघाने डीबेंचर स्वरूपात कपात केलेली ४० टक्के रक्कम प्राथमिक दूध संस्थांना परत करावी, अन्यथा यासह अन्य कोल्हापूर जिल्हा दूध उत्पादक संघटनेच्या नेतृत्वाखाली जिल्ह्यातील दूध उत्पादक संस्था प्रतिनिधींनी गोकुळ समोर दिवाळीत तीव्र आंदोलन करतील असा इशारा देण्यात आला होता.