भारतीय कसोटी संघाचा महत्वाचा खेळाडू चेतेश्वर पुजारा बाबा बनणार आहे. नवीन वर्षात चेतेश्वर पुजाराने ही आनंदाची बातमी आपल्या चाहत्यांना ट्विटरच्या माध्यमातून दिली आहे. आपली पत्नी पुजासोबत फोटो शेअर करत चेतेश्वर पुजाराने आपला आनंद व्यक्त केला आहे. चेतेश्वर पुजारा आणि पुजा २०१३ साली विवाहबद्ध झाले होते.

२०१७ सालात घरच्या मैदानावर खेळताना चेतेश्वर पुजाराने धावांचा पाऊस पाडत, कसोटी क्रमवारीत तिसरं स्थान पटकावलं होतं. आतापर्यंत ५४ कसोटी सामन्यांमध्ये चेतेश्वर पुजाराने ५२.९६ च्या सरासरीने ४३९६ धावा काढल्या आहेत. सध्या चेतेश्वर पुजारा दक्षिण आफ्रिकेतील केप टाऊन शहरात आहे. ५ जानेवारीपासून भारत विरुद्ध दक्षिण आफ्रिका यांच्यात पहिल्या कसोटी सामन्याला सुरुवात होणार आहे. या दौऱ्यात भारतीय संघ ३ कसोटी, ६ वन-डे आणि ३ टी-२० सामने खेळणार आहे.