न्यूझीलंडविरुद्ध पहिल्या वन-डे सामन्यात भारतीय संघाने श्रेयस अय्यरचं शतक आणि विराट-लोकेश राहुलच्या अर्धशतकांच्या जोरावर ३४७ धावांचा डोंगर उभा केला. भारताच्या या धावसंख्येचा पाठलाग करताना न्यूझीलंडनेही चांगली सुरुवात केली. मार्टीन गप्टील आणि हेन्री निकोसल यांनी पहिल्या विकेटसाठी ८५ धावांची भागीदारी केली. हेन्री निकोसलने यादरम्यान आपलं अर्धशतकही पूर्ण केलं.

मार्टीन गप्टील माघारी परतल्यानंतर, टॉम ब्लंडलही स्वस्तात माघारी परतला. यानंतर निकोलस आणि रॉस टेलर यांच्यात ६२ धावांची महत्वपूर्ण भागीदारी रचली. निकोलसने खेळपट्टीवर जम बसवल्यामुळे भारताला ही जोडी डोकेदुखी ठरणार अशी चिन्ह दिसत होती. मात्र जसप्रीत बुमराहच्या गोलंदाजीवर एक धाव घेताना निर्माण झालेल्या गोंधळावर निकोसल धावबाद झाला. विराट कोहलीनेही संधीचा फायदा उचलत हवेत उडी घेत निकोलसला माघारी धाडलं. विराटच्या या अफलातून रन-आऊटचा व्हिडीओ सोशल मीडियावर व्हायरल होतो आहे.

८२ चेंडूंमध्ये हेन्री निकोलसने ११ चौकारांसह ७८ धावांची खेळी केली.