लंडन : इंग्लंडच्या विश्वविजेतेपदात महत्त्वाची भूमिका बजावणारा जोफ्रा आर्चर कसोटी पदार्पण करणार आहे. लॉर्ड्सवर होणाऱ्या ऑस्ट्रेलियाविरुद्धच्या दुसऱ्या कसोटी सामन्यासाठी इंग्लंडने जाहीर केलेल्या १२ खेळाडूंच्या यादीत आर्चरला स्थान देण्यात आले आहे. मात्र त्यांनी मोईन अलीला वगळले आहे. दुखापतीमुळे जेम्स अँडरसनने माघार घेतल्यामुळे दुसऱ्या कसोटीसाठी वेगवान गोलंदाज आर्चरला संधी मिळू शकेल. एजबॅस्टनला झालेला पहिला कसोटी सामना इंग्लंडने २५१ धावांनी गमावला होता. दुखापतीमुळे आर्चरला पहिल्या सामन्यात खेळता आले नव्हते. ऑफ-स्पिनर मोईन अलीच्या जागी डावखुरा फिरकी गोलंदाज जॅक लीचला इंग्लंडच्या संघात स्थान देण्यात आले आहे. वेगवान गोलंदाज ऑली स्टोनने पाठीच्या दुखापतीमुळे माघार घेतली आहे.