इंग्लंड आणि विंडीज यांच्यात कसोटी मालिका सुरु आहे. या कसोटी मालिकेत विंडीजने २-० अशी विजयी आघाडी घेतली आहे. या मालिकेतील तिसरा सामना सुरु असून या सामन्यात विंडीजच्या कीमो पॉलला मैदानात क्षेत्ररक्षण करताना गंभीर दुखापत झाली. या दुखापतीनंतर तो मैदानावर पडला आणि त्याला स्ट्रेचरवरून थेट रुग्णालयात घेऊन जाण्यात आले. कसोटी सामन्यात तिसऱ्या दिवसाचा खेळ सुरु होता. खेळाच्या चौथ्या षटकात शॅनन गॅब्रियल याने चेंडू टाकला. शॅननच्या गोलंदाजीवर जो डेन्लीने फटका लगावला. हा फटका अडवताना पॉलला दुखापत झाली. त्याला हॅमस्ट्रिंगची दुखापत झाली आणि त्याचे स्नायू ताणले गेल्याने त्याला उठताही आले नाही. विंडीज क्रिकेट मंडळाने याबाबत ट्विट करत माहिती दिली. #WIvENG Injury Update: Keemo Paul has suffered a right quadricep strain and is unlikely to return to field before tea. — Windies Cricket (@windiescricket) February 11, 2019 दरम्यान, दिवसाचा खेळ संपेपर्यंत पॉल मैदानावर आला नाही. त्याला झालेली दुखापत ही गंभीर स्वरुपाची असल्याचे समजते. त्यामुळे या सामन्यात त्याला खेळता येणार नाही. तसेच, पॉलला या दुखापतीमधून बाहेर येण्यासाठी जवळपास दीड महिना लागू शकतो, असे म्हटले जात आहे. त्यामुळे एकदिवसीय मालिकेलाही तो मुकण्याची शक्यता आहे.