IND vs AUS 2nd ODI: मिचेल स्टार्कच्या वेगवान माऱ्यापुढं टीम इंडियाची दाणादाण; ऑस्ट्रेलियाला ११८ धावांचं आव्हान

ऑस्ट्रेलियाचा वेगवान गोलंदाज मिचेल स्टार्कने या सामन्यातही भेदक गोलंदाजी केली. भारताच्या पाच फलंदाजांना स्वस्तात माघारी पाठवण्यात स्टार्क यशस्वी झाला. भारतासाठी सलामीला मैदानात उतरलेल्या शुबमन गिलला भोपळाही फोडता आला नाही. कर्णधार रोहित शर्माने १५ चेंडूत १३ धावा केल्या. रोहित आणि शुबमन दोघेही स्टार्कच्या गोलंदाजीवर बाद झाले. त्यानंतर विराट कोहलीने डाव सावरण्याचा प्रयत्न केला. पण त्यालाही मोठी धावसंख्या उभारता आली नाही. विराटने ३५ चेंडूत ३१ धावा केल्या. अक्षर पटेलने सावध खेळी करत २९ चेंडूत २९ धावांची नाबाद खेळी केली.

नक्की वाचा – IND vs AUS 2nd ODI : वर्ल्डकप २०२३ मध्ये ‘अशी’ असेल टीम इंडियाची प्लेईंग XI? कर्णधार रोहित शर्माने केला खुलासा, म्हणाला…

ऑस्ट्रेलियाचा गोलंदाज सीन अबॉटने ३ विकेट घेतल्या. तर नथन एलिसने भारताच्या दोन फलंदाजांना बाद केलं.तसंच सूर्यकुमार यादव या सामन्यातही शून्यावर बाद झाला. मागील सामन्यात धडाकेबाज खेळी करणारा के एल राहुल आजच्या सामन्यात फक्त ९ धावा करून माघारी परतला. हार्दिक पांड्यालाही धावांचा सूर गवसला नाही. हार्दिक एक धाव करून तंबूत परतला. त्यानंतर जडेजाने डाव सावरत १६ धावा केल्या. पण त्यालाही भारताच्या धावसंख्येचा आलेख चढता ठेवता आला नाही.