Rohit Sharma: “एक फायनल हरली म्हणून तो खराब…”, रोहित शर्माच्या कर्णधारपदावर माजी ऑस्ट्रेलियन खेळाडूचे मोठे विधान

टीम इंडिया सलग दुसऱ्यांदा वर्ल्ड टेस्ट चॅम्पियनशिपच्या फायनलमध्ये विजयी होण्यात अयशस्वी ठरली. या सामन्यातील पराभवानंतर कर्णधार रोहित शर्मालाही टीकेला सामोरे जावे लागले. त्यातच या सामन्यात रविचंद्रन अश्विनला न खेळवण्याच्या त्याच्या निर्णयाने सर्वांनाच आश्चर्याचा धक्का बसला आहे. ऑस्ट्रेलियाचा माजी फलंदाज मायकल क्लार्कने रोहित शर्माच्या कर्णधारपदावर मोठं वक्तव्य केलं आहे. फायनल हरल्यामुळे रोहितला “वाईट कर्णधार म्हणणे चुकीचे ठरेल”, असे क्लार्कचे मत आहे.

हेही वाचा: World Cup 2023: “पाकिस्तानच्या आडमुठेपणामुळेच…”, वर्ल्डकपच्या वेळपत्रकावरून BCCIने PCBला चांगलेच खडसावले

रोहितच्या नेतृत्वाखाली भारताने ही आयसीसी ट्रॉफी गमावली

रोहित शर्माच्या नेतृत्वाखाली भारताची २०२२ आशिया कप जिंकण्याची संधी हुकली. यानंतर २०२२ मध्येच आयसीसी टी२० वर्ल्ड कपच्या सेमीफायनलमध्ये इंग्लंडला पराभवाचा सामना करावा लागला होता. त्यानंतर नुकत्याच झालेल्या २०२३ आयसीसी वर्ल्ड टेस्ट चॅम्पियनशिपच्या अंतिम फेरीत ऑस्ट्रेलियाने टीम इंडियाचा पराभव केला. रोहित शर्माची फलंदाजीही चांगली चाललेली नाही. ऑस्ट्रेलियाविरुद्धही त्याची बॅट शांत होती. अशा परिस्थितीत आता त्याच्यावर प्रश्न उपस्थित केले जात आहेत.

‘या’ दिग्गजाने कर्णधारपदाबाबत मोठं वक्तव्य केलं आहे

ऑस्ट्रेलियाचा माजी क्रिकेटपटू मायकल क्लार्क रोहित शर्माच्या कर्णधारपदाबद्दल म्हणाला, “मी रोहितवर विश्वास ठेवीन. तो खूप चांगला कर्णधार आहे. त्याचा आक्रमक दृष्टिकोन पहा, तो सकारात्मक दिसतो आणि त्याने मुंबई इंडियन्सला भरपूर यश मिळवून दिले आहे. केवळ भारत वर्ल्ड टेस्ट चॅम्पियनशिप जिंकू शकला नाही, याचा अर्थ असा नाही की भारताचे नेतृत्व करण्यासाठी रोहित योग्य व्यक्ती नाही. एक फायनल हरली म्हणून तो खराब होत नाही.”

हेही वाचा: PCB Chairman: BCCIला धमकी देणाऱ्या नजम सेठींची खुर्ची धोक्यात! आशिया कप आधीच होणार गच्छंती

आगामी मालिकेत संधी मिळणार नाही?

टीम इंडियाचे सर्व खेळाडू सध्या सुट्टी साजरी करत आहेत. यानंतर संघाला १२ जुलैपासून वेस्ट इंडिजविरुद्ध तिन्ही फॉरमॅटमध्ये क्रिकेट खेळायचे आहे. यानंतर टीम इंडियाला वर्षाच्या अखेरीपर्यंत सलग सामने खेळावे लागतील, ज्यामध्ये आशिया कप आणि एकदिवसीय विश्वचषक या दोन मोठ्या स्पर्धांचाही समावेश आहे. वृत्तानुसार, रोहित शर्माला वेस्ट इंडिज दौऱ्यावरील कसोटी मालिकेत विश्रांती दिली जाऊ शकते. या दौऱ्यासाठी बीसीसीआयने अद्याप संघ जाहीर केलेला नाही.