ENG vs AUS 3rd Test: हॅरी ब्रूकने इंग्लंडसाठी रचला इतिहास! ‘हा’ कारनामा करणारा ठरला जगातील दुसरा खेळाडू

हॅरी ब्रूक हा कसोटी सामन्यात सर्वात कमी चेंडूत हजार धावा करणारा इंग्लंडचा पहिला खेळाडू ठरला आहे. हॅरी ब्रूकने कसोटी फॉरमॅटमध्ये १०५८ चेंडूत हजार धावांचा टप्पा पार केला. त्याचबरोबर या यादीत न्यूझीलंडचा कॉलिन डी ग्राम होम पहिल्या क्रमांकावर आहे. या किवी खेळाडूने कसोटी फॉरमॅटमध्ये ११४० चेंडूत १००० धावांचा टप्पा गाठला. या विशेष यादीत तिसरे नाव आहे न्यूझीलंडच्या टीम साऊदीचे.

या यादीत कोणाचा आहे समावेश?

न्यूझीलंडचा खेळाडू टीम साऊदीने ११६७ चेंडूत कसोटीत हजार धावांचा टप्पा पार केला. त्याचबरोबर या प्रकरणात इंग्लंडचा सलामीवीर बेन डकेट चौथ्या क्रमांकावर आहे. बेन डकेटने कसोटी फॉरमॅटमध्ये ११६८ चेंडूत १००० धावांचा टप्पा गाठला आहे. मात्र, ऑस्ट्रेलियाविरुद्धच्या लीड्स कसोटीत इंग्लंडच्या हॅरी ब्रूकने नवा विक्रम केला आहे. या इंग्लिश फलंदाजाने १०५८ चेंडूत हजार धावांचा टप्पा पूर्ण केला आहे.

हॅरी ब्रूकने ७५ धावांची शानदार खेळी साकारली –

इंग्लंडसाठी दुसऱ्या डावात युवा स्टार हॅरी ब्रुकने ९३ चेंडूचा सामना करताना ९ चौकारांच्या मदतीने ७५ धावांची शानदार खेळी केली. ब्रूकशिवाय सलामीवीर जॅक क्रॉलीने ४४ धावांचे योगदान दिले. बेन डकेट २३, जो रूट २१ आणि कर्णधार बेन स्टोक्स १३ धावा करून बाद झाले. मोईन अली आणि जॉनी बेअरस्टो यांना प्रत्येकी पाच धावाच करता आल्या. ख्रिस वोक्सने नाबाद ३२ आणि मार्क वुडने नाबाद १६ धावा केल्या. ऑस्ट्रेलियाच्या मिचेल स्टार्कने पाच विकेट घेतल्या. मिचेल मार्श आणि पॅट कमिन्स यांना प्रत्येकी एक विकेट मिळाली.