Ball Tampering: विश्वचषकादरम्यान न्यूझीलंडसाठी वाईट बातमी! अनुभवी फलंदाजावर चेंडूशी छेडछाड केल्याचा आरोप

एकदिवसीय विश्वचषकानंतर न्यूझीलंडला बांगलादेशचा दौरा करायचा आहे. त्या संघात हेन्री निकोल्सचा समावेश आहे. न्यूझीलंडमधील प्लंकेट शील्ड या देशांतर्गत स्पर्धेदरम्यान त्याच्यावर चेंडूशी छेडछाड केल्याचा आरोप आहे. आरोप खरे ठरले तर त्याच्या अडचणी वाढू शकतात.

काय आहे संपूर्ण प्रकरण?

प्लंकेट शील्ड स्पर्धेत (प्रथम श्रेणी स्पर्धा) कँटरबरी आणि ऑकलंड यांच्यात खेळल्या गेलेल्या सामन्याचा व्हिडिओ व्हायरल झाला आहे. निकोल्सवर हेल्मेटच्या मदतीने चेंडूशी छेडछाड केल्याचा आरोप आहे. व्हिडीओमध्ये तो हेल्मेटने चेंडू घासत असल्याचे दिसत आहे. त्याच्यावरील आरोप सिद्ध झाल्यास त्याच्यावर सहा कसोटी किंवा १२ एकदिवसीय सामन्यांची बंदी घातली जाऊ शकते.

हेही वाचा – SA vs AFG: अफगाणिस्तानने दक्षिण आफ्रिकेसमोर ठेवले २४५ धावांचे लक्ष्य, अजमतुल्ला उमरझाईने खेळली नाबाद ९७ धावांची खेळी

काय म्हणाले न्यूझीलंड क्रिकेट बोर्ड?

न्यूझीलंड क्रिकेटलाही हेन्री निकोल्सच्या प्रकरणाबाबत निवेदन जारी करावे लागले आहे. आचारसंहितेच्या नियम ३.१ च्या कलम १.१५ चे उल्लंघन केल्याप्रकरणी हेन्री निकोल्सच्या विरोधात तक्रार दाखल करण्यात आल्याचे बोर्डाने म्हटले आहे. कँटरबरी आणि ऑकलंड यांच्यात हॅगले ओव्हल येथे झालेल्या प्लंकेट शील्ड सामन्याच्या तिसऱ्या दिवशी त्याने ही चूक केली.

हेन्री निकोल्सची कारकीर्द –

हेन्री निकोल्सने न्यूझीलंडकडून ५४ कसोटी, ७२ एकदिवसीय आणि १० टी-२० सामने खेळले आहेत. कसोटीत त्याने ३८.७८ च्या सरासरीने २९४८ धावा केल्या आहेत. त्याच वेळी, एकदिवसीय सामन्यात त्याने ३५.६३ च्या सरासरीने आणि ८०.८९ च्या स्ट्राइक रेटने १९६० धावा केल्या आहेत. टी-२० मध्ये निकोल्सने १२.५० च्या सरासरीने आणि ८९.२८ च्या स्ट्राईक रेटने १०० धावा केल्या आहेत. निकोल्सने ११५ प्रथम श्रेणी सामनेही खेळले आहेत. या कालावधीत ४०.२२ च्या सरासरीने ६९५९ धावा केल्या आहेत.