IND vs ENG : ‘अभिषेक शर्माला शेवटची संधी…’, इंग्लंडविरुद्धच्या मालिकेपूर्वी माजी भारतीय दिग्गजाचे मोठे वक्तव्य

२०२४ मध्ये झिम्बाब्वेविरुद्धच्या दुसऱ्या टी-२० सामन्यात ४७ चेंडूत स्फोटक शतक झळकावले. भारताचा माजी फलंदाज आकाश चोप्राने शर्माची क्षमता मान्य केली आहे, परंतु त्याला संघात आपले स्थान कायम ठेवायचे असेल, तर त्याला बुधवारपासून ईडन गार्डन्सवर सुरू होणाऱ्या इंग्लंडविरुद्धच्या पाच सामन्यांच्या मालिकेत चांगली कामगिरी करावी लागेल. आकाश चोप्रा म्हणाला, ‘अभिषेकचा फॉर्म थोडा वर-खाली झाला आहे. पदार्पणात, त्याच्या दुसऱ्या टी-२० सामन्यात, त्याने झिम्बाब्वेविरुद्ध शतक झळकावले. त्यानंतर तो त्या रूपात दिसला नाही.’

अभिषेक शर्मासाठी ही शेवटची संधी –

माजी खेळाडू पुढे म्हणाला, “मला वाटते की अभिषेक शर्मासाठी ही शेवटची संधी आहे. त्यामुळे त्याने या मालिकेत चांगली कामगिरी केली तर त्याच्यासाटी फायदेशीर ठरले. पण हे ५ सामने आहेत, मी त्याला म्हणेन की त्याने पुढे जाऊन आपल्या पद्धतीने खेळावे. जसे संजूने गेल्या ३ सामन्यात नाव कमावले आहे. तसेच अभिषेक शर्मालाही हे काम करावे लागणार आहे. अन्यथा वेळेत थोडा बदल होऊन जैस्वाल संघात परतेल.”

हेही वाचा – Champions Trophy 2025 : “युझवेंद्र चहलची फाईल बंद केली आहे…”, माजी खेळाडूचा बीसीसीआय आणि संघ व्यवस्थापनावर आरोप

अभिषेक शर्माची कामगिरी –

अभिषेक शर्माने १२ टी-२० सामन्यांमध्ये राष्ट्रीय संघाचे प्रतिनिधित्व केले असून झिम्बाब्वेविरुद्धचे शतक वगळता त्याने ११ सामन्यांमध्ये १५६ धावा केल्या आहेत. त्याचा स्ट्राईक रेट १७१.८१ असला तरी त्याची सरासरी २३.२७ ही निश्चितच चिंतेची बाब आहे. वेगवान गोलंदाज मोहम्मद शमीचे पुनरागमन पुढील महिन्यात सुरू होणाऱ्या चॅम्पियन्स ट्रॉफीपूर्वी सूर्यकुमार यादवच्या नेतृत्वाखालील संघाला बळ देईल. शमी भारताकडून अखेरचा सामना एकदिवसीय विश्वचषक फायनल नोव्हेंबर २०२३ मध्ये ऑस्ट्रेलियाविरुद्ध खेळला होता.

हेही वाचा – Champions Trophy: भारताच्या चॅम्पियन्स ट्रॉफी जर्सीवर पाकिस्तानचं नाव असणार की नाही? ICC ने स्पष्टच सांगितलं

‘बॅट विरुद्ध बॅट’ –

आकाश चोप्रा यांनी या मालिकेला ‘बॅट विरुद्ध बॅट’ असे म्हटले आहे. त्याच्या मते, ही बॅट विरुद्ध बॅट स्पर्धा होणार आहे, कारण फलंदाजी दोन्ही बाजूंनी भारी आहे. संघर्ष पाहिला तर तो हलका संघर्ष नाही. ही एक जोरदार फटकेबाजीची मालिका होणाप आहे, ज्यामध्ये तुम्ही एक षटकार मारला तर दुसरा संघ दोन षटकार मारु शकतो. पहिल्या सामन्यातूनच गती सेट केली जाऊ शकते आणि इतर संघ देखील त्याच दृष्टीकोनातून त्याकडे पाहतील.