IND vs ENG : अभिषेक शर्माने मोडला युवराज सिंगचा खास विक्रम, कोलकात्यात साकारली स्फोटक खेळी

अभिषेक शर्माने मोडला युवराज सिंगचा मोठा विक्रम –

अभिषेक शर्माने आक्रमक फलंदाजी करताना ७९ धावा केल्या. त्याने ३४ चेंडूंचा सामना करताना त्याने ५ चौकार आणि ८ षटकार मारले. या खेळीच्या जोरावर अभिषेकने त्याचा गुरु युवराज सिंगचा एक खास विक्रम मोडला आहे. इंग्लंडविरुद्ध टी-२० डावात सर्वाधिक षटकार मारणारा तो भारतीय फलंदाज ठरला आहे. कोलकात्यात अभिषेकने ८ षटकार ठोकले. तर युवराजने २००७ मध्ये इंग्लंडविरुद्ध ६ षटकार मारले होते. सूर्याने पण २०२२ मध्ये ६ षटकार मारले आहेत.

अभिषेक शर्माने टीम इंडियासाठी दमदार कामगिरी करत अवघ्या २० चेंडूत अर्धशतक झळकावले. या फॉरमॅटमध्ये भारतीयाने केलेली दुसरी सर्वात वेगवान खेळी आहे. आंतरराष्ट्रीय टी-२० मध्ये सर्वात जलद अर्धशतक झळकावण्याचा विक्रम युवराज सिंगच्या नावावर आहे, जो आजपर्यंत कोणीही मोडू शकलेले नाही. त्याने १२ चेंडूत हा पराक्रम केला होता. अभिषेकच्या ब्लॉकबस्टर शोपूर्वी, सॅमसनचे तुफानही पाहायला मिळाले, जेव्हा त्याने गस ऍटकिन्सनच्या एका षटकात चार चौकार आणि एका षटकारासह एकूण २२ धावा केल्या. मात्र, त्याला या खेळीचे मोठ्या धावांमध्ये रूपांतर करता आले नाही.

हेही वाचा – Champions Trophy 2025 : “युझवेंद्र चहलची फाईल बंद केली आहे…”, माजी खेळाडूचा बीसीसीआय आणि संघ व्यवस्थापनावर आरोप

अर्शदीप सिंगने घडवला इतिहास –

डावखुरा वेगवान गोलंदाज अर्शदीप सिंगने या सामन्यात इतिहास घडवला आहे. तो टी-२० आंतरराष्ट्रीय क्रिकेटमध्ये सर्वाधिक ९७ विकेट्स घेणारा भारताचा गोलंदाज ठरला आहे. यादरम्यान त्याने ९६ विकेट्स घेणाऱ्या युझवेंद्र चहलला मागे टाकले. अर्शदीपने २०२२ मध्ये त्याचे टी-२० आंतरराष्ट्रीय पदार्पण केले आणि चहलच्या ८० टी-२० सामन्यांपेक्षा १९ सामने कमी असलेल्या त्याच्या ६१व्या सामन्यात हा पराक्रम केला. २५ वर्षीय अर्शदीपने या फॉरमॅटमध्ये ८.३२ च्या इकॉनॉमी रेटने गोलंदाजी केली आहे.