IND vs NED: सलग नववा विजय मिळवत भारताने रचला इतिहास! नेदरलँड्सचा १६० धावांनी पराभव करत चाहत्यांना दिली दिवाळीची भेट

टीम इंडियाचा सामना आता पहिल्या उपांत्य फेरीत १५ नोव्हेंबरला मुंबईच्या वानखेडे स्टेडियमवर न्यूझीलंडशी होणार आहे. भारत या स्पर्धेत आतापर्यंत अपराजित आहे. त्यांनी सर्व नऊ संघांचा पराभव केला आहे. भारताने ऑस्ट्रेलिया, अफगाणिस्तान, पाकिस्तान, बांगलादेश, न्यूझीलंड, इंग्लंड, श्रीलंका, दक्षिण आफ्रिका आणि नेदरलँड्सचा पराभव केला. गुणतालिकेत टीम इंडियाचे १८ गुणांसह अव्वल स्थानी आहे. दुसरीकडे, नेदरलँड्सने विश्वचषकातील आपला प्रवास तळाच्या १०व्या स्थानावर संपवला. नेदरलँड्सला नऊ सामन्यांत दोन विजय मिळवता आले आणि सात सामन्यांत पराभवाला सामोरे जावे लागले. या पराभवानंतर नेदरलँड चॅम्पियन्स ट्रॉफी २०२५ मध्ये सहभागी होऊ शकणार नाही.

तेजा निदामनुरुने नेदरलँड्सकडून सर्वाधिक धावा केल्या –

लक्ष्याचा पाठलाग करताना सातव्या क्रमांकावर फलंदाजी करणाऱ्या तेजा निदामनुरूने नेदरलँड्सकडून सर्वाधिक ५४ धावांची खेळी केली. यादरम्यान त्याच्या बॅटमधून सहा षटकार आणि एक चौकार आला. तेजा नंतर, संघाचा दुसरा सर्वाधिक धावा करणारा सिब्रांड एंजेलब्रेक्ट होता. चौथ्या क्रमांकावर फलंदाजी करताना एंजेलब्रेक्टने ४५ धावा केल्या. या दोन फलंदाजांव्यतिरिक्त तिसऱ्या क्रमांकावर खेळताना कॉलिन अकरमनने ३५ धावांचे योगदान दिले. राट कोहली आणि रोहित शर्मानेही गोलंदाजी करताना १-१ विकेट घेतली. त्याचबरोबर बुमराह, सिराज, कुलदीप आणि जडेजाने २-२ विकेट्स घेतल्या.

हेही वाचा – IND vs NED, World Cup 2023: रोहित शर्माने मोडला इऑन मॉर्गनचा विक्रम, सचिन तेंडुलकरच्या ‘या’ विक्रमाशी केली बरोबरी

तत्पूर्वी टीम इंडियाने प्रथम फलंदाजी करताना ४१० धावांची मोठी धावसंख्या उभारली होती. भारताकडून श्रेयस अय्यर (नाबाद १२८) आणि केएल राहुल (१०२) यांनी शतके झळकावली. विश्वचषकात भारताची ही दुसरी सर्वोच्च धावसंख्या ठरली आहे. याआधी शुबमन गिल ५१, रोहित शर्मा ६१ आणि विराट कोहलीने ५१ यांनी अर्धशतके झळकावली होती. एकदिवसीय क्रिकेटच्या इतिहासात प्रथमच, भारताच्या शीर्ष ५ खेळाडूंनी ५० पेक्षा जास्त धावा केल्या. केएल राहुलने अवघ्या ६२ चेंडूत शतक झळकावले. राहुल आता भारतासाठी सर्वात जलद शतक झळकावणारा फलंदाज बनला आहे.