IND vs WI: रोहितच्या नेतृत्वात संधी न मिळाल्याने होणार ‘हा’ खेळाडू निवृत्त? वेस्ट इंडिज मालिकेपूर्वी घोषणा करण्याची शक्यता

दरम्यान, टीम इंडियाचा असा एक क्रिकेटर आहे ज्याला बीसीसीआयने कोणत्याही फॉरमॅटसाठी वेस्ट इंडीज दौऱ्यावर संघात संधी दिलेली नाही. इतकंच नाही तर आता हा दिग्गज खेळाडू राष्ट्रीय संघात पुनरागमन करू शकणार नाही, अस आता त्याच्या चाहत्यांना वाटत आहे.

त्या खेळाडूचे वय ३८ वर्षे आहे

ज्या दिग्गज खेळाडूचा उल्लेख केला जात आहे तो दुसरा कोणी नसून महाराष्ट्राचा केदार जाधव आहे. या 38 वर्षीय अनुभवी खेळाडूला कधीही कसोटी फॉरमॅटमध्ये संधी देण्यात आली नाही. रोहित शर्माच्या नेतृत्वाखाली ३८ वर्षांच्या केदार जाधवची कारकीर्दही इतकी चमकली नाही. २०२० नंतर केदार जाधवची कोणत्याही फॉरमॅटसाठी संघात निवड झालेली नाही. ऑकलंडमध्ये न्यूझीलंडविरुद्ध वन डे खेळताना तो अखेरचा टीम इंडियाच्या जर्सीत दिसला होता.

हेही वाचा: K. Shrikant: “तो जर असता तर टीम इंडिया चॅम्पियन…”, माजी सलामीवीर श्रीकांत यांनी भारताच्या ‘या’ खेळाडूची काढली आठवण

निवृत्तीची घोषणा करणार?

वेस्ट इंडिजविरुद्धच्या तीन सामन्यांच्या वन डे मालिकेसाठी नुकतीच टीम इंडियाची घोषणा करण्यात आली होती, ज्यामध्ये निवडकर्त्यांनी केदार जाधवचा विचार देखील केलेला नाही. आता हा दिग्गज अष्टपैलू खेळाडू भारतीय संघात पुन्हा येऊ शकणार नाही, असे स्पष्ट संकेत निवडकर्त्यांनी दिले आहेत. जुलैमध्ये होणाऱ्या या मालिकेपूर्वी केदार जाधव निवृत्तीची घोषणा करू शकतो, अशीही अटकळ बांधली जात आहे. आपल्या कारकिर्दीत ७३वन डे आणि ९ टी२० आंतरराष्ट्रीय सामने खेळणाऱ्या केदार जाधवसाठी जरी हा निर्णय सोपा नसला तरी तो घेऊ शकतो, अशी सूत्रांकडून माहिती मिळाली आहे.

विराटच्या कर्णधारपदाखाली करिअर चमकले

विराट कोहलीच्या नेतृत्वाखाली केदार जाधवची कारकीर्द बहरली. यापूर्वी, केदारने अनुभवी महेंद्रसिंग धोनीच्या नेतृत्वाखाली फक्त ९ एकदिवसीय सामने खेळले पण विराटने त्याला ५४ वन डेत संधी दिली. यादरम्यान केदारने ४१.०७ च्या सरासरीने धावा केल्या. रोहित शर्माने त्याला केवळ ७ एकदिवसीय सामन्यांमध्ये संधी दिली आणि त्यात तो केवळ ८६ धावाच करू शकला. अजिंक्य रहाणेच्या नेतृत्वाखाली केदार जाधवने ३ एकदिवसीय सामने खेळले आणि एका शतकाच्या जोरावर एकूण १२६ धावा केल्या. अशा स्थितीत विराटच्या नेतृत्वाखाली केदारची कारकीर्द चमकली, असे स्पष्टपणे मानता येईल.

हेही वाचा: WC 2023: पीसीबीच्या आडमुठेपणावर माजी खेळाडू वसीम अक्रम भडकले, म्हणाले, “तुम्ही बोलाल तिथे खेळू पण…”

अशी आहे केदार जाधवची कारकीर्द

या मधल्या फळीतील फलंदाजाने आपल्या कारकिर्दीत ७३ एकदिवसीय आणि ९ टी२० आंतरराष्ट्रीय सामने खेळले. तो आयपीएलमधील अनुभवी महेंद्रसिंग धोनीचा संघ चेन्नई सुपर किंग्ज (CSK) कडून खेळताना दिसला होता. त्याने एकदिवसीय क्रिकेटमध्ये २ शतके आणि ६ अर्धशतकांच्या मदतीने १३८९ धावा केल्या, टी२० आंतरराष्ट्रीय फॉर्मेटमध्ये त्याने एका अर्धशतकासह १२२ धावा केल्या आहेत.