चेन्नईमध्ये कोलकाता नाईट रायडर्सविरोधातील सामन्यात मुंबई इंडियन्सचा फलंदाज सूर्यकुमार यादवने अर्धशतक झळकावलं. सूर्यकुमार यादवचं आयपीएलमधील हे १३ वं अर्धशतक ठरलं. सूर्यकुमारने जबरदस्त फटकेबाजी करत फक्त ३३ चेंडूत अर्धशतक पूर्ण केलं. ४४ धावांवर असताना उत्तुंग षटकार लगावत सूर्यकुमारने अर्धशतक साजरं केलं. मैदानाबाहेर लगावलेला हा षटकार पाहून हार्दिक पांड्याला आश्चर्याचा धक्काच बसला.

१० व्या ओव्हरमध्ये प्रसिध कृष्णा गोलंदाजी करत होता. यावेळी सूर्यकुमारने लगावलेला षटकार थेट मैदानाबाहेर गेला. सूर्यकुमारचा हा शॉट पाहून हार्दिक पांड्याला काही काळ आपल्या डोळ्यांवरच विश्वास बसत नव्हता. आश्चर्यचकित झालेल्या हार्दिक पांड्या त्याच अवस्थेत टाळ्या वाजवताना व्हिडीओत दिसत आहे.

सूर्यकुमारच्या ५६ धावांव्यतिरिक्त फक्त रोहित शर्मा (४३) चांगली खेळी करु शकला. मुंबई इंडियन्सची फलंदाजी पुन्हा एकदा ढासळलेली पहायला मिळाली. आंद्रे रसेलने मुंबई इंडियन्सच्या पाच फलंदाजांना माघारी धाडलं. प्रथम फंलदाजी करणाऱ्या मुंबईने कोलकातासमोर १५३ धावांचं आव्हान ठेवलं होतं.

This quiz is AI-generated and for edutainment purposes only.

शुभमन गिल आणि नितीश राणाने पहिल्या विकेटसाठी ७२ धावांची भागीदारी करत संघाला चांगली सुरुवात करुन दिली होती. शुभमन गिल ३३ धावांवर बाद झाला. दरम्यान नितीश राणाने सलग दुसरं अर्धशतक साजरं केलं. केकेआरचे इतर फंलदाज चांगली कामगिरी करु न शकल्याने मुंबई इंडियन्सने १० धावांनी हा सामना जिंकला आणि सोबत पहिल्या विजयाची नोंद केली.