RCB vs DC: “हे माझं होमग्राऊंड आहे…”, षटकार लगावला, मग बॅट आदळली; राहुलचं दिल्लीच्या विजयानंतरचं सेलिब्रेशन होतंय व्हायरल; पाहा VIDEO

केएल राहुलने जमिनीवर बॅट आदळत विजयाचं आक्रमक सेलिब्रेशन केलं आणि त्याने खुणवत हे माझं होमग्राऊंड असल्याचं सर्वांना दाखवलं. राहुलने खेळीनंतर खाली जमिनीकडे हात दाखवला आणि त्यानंतर स्वत:कडे बोट दाखवत कमालीचं सेलिब्रेशन केलं. राहुलच्या त्याच्या आक्रमकतेचं एक कारण म्हणजे बेंगळुरू हे त्याचं होमग्राउंड आहे आणि आयपीएल २०२५ च्या लिलावापूर्वी अशी चर्चा होती की आरसीबी संघ केएल राहुलला खरेदी करू शकतो पण तसे झाले नाही.

केएल राहुलला आयपीएल लिलावात दिल्ली कॅपिटल्सने विकत घेतले आणि आता तो या हंगामात पहिल्यांदाच बंगळुरूच्या मैदानावर खेळण्यासाठी उतरला आणि मॅचविनर ठरला. म्हणूनच सामना संपल्यानंतर केएल राहुलने हेच त्याचं घरचं मैदान असल्याचे खुणावत सांगितले. केएल राहुल यंदा आक्रमक खेळ खेळताना दिसत आहे.

सामन्यानंतर सामनावीराचा पुरस्कार घेतल्यावरही केएल राहुलने त्याच्या विजयाच्या सेलिब्रेशनबद्दल सांगितलं. दिल्लीच्या विजयानंतर राहुल म्हणाला, “ही खेळपट्टी थोडी अवघड होती. २० षटकं विकेटच्या मागे राहून खेळपट्टी कशी आहे, याचा मी अंदाज घेतला. विकेटकिपिंग करताना मी पाहिलं की चेंडू बॅटवर कसा येत आहे, त्यामुळे मला कसे शॉट खेळायचे आहेत याची माहिती होती.”

पुढे राहुल म्हणाला, “मला फक्त एक चांगली सुरूवात करायची होती. आक्रमक सुरूवात करून नंतर खेळी पुढे न्यायची होती. जर मला षटकार मारायचा आहे, तर मला माहित होतं कोणती बाजू मी टार्गेट करू शकतो. विकेटकिपिंगमुळे मला कळलं की इतर फलंदाज कसे खेळले आणि ते कुठे बाद झाले. माझा कॅच ड्रॉप झाला, मी नशीबवान होतो.” राहुल अखेरीस म्हणाला, “हे माझं होमग्राऊंड आहे, कोणाहीपेक्षा जास्त मला याची सर्वात जास्त माहिती आहे. या मैदानावर खेळायला मजा येते.” केएल राहुलच्या या सेलिब्रेशनचा व्हीडिओ चांगलाच व्हायरल होत आहे.