RCB vs SRH: विक्रमी शतकानंतर विराटनं मैदानावरच अनुष्काला लावला व्हिडीओ कॉल! फोटो व्हायरल

नेमकं काय घडलं?

गुरुवारी रॉयल चॅलेंजर्स बँगलोर विरुद्ध सनरायजर्स हैदराबाद हा आयपीएलच्या यंदाच्या पर्वातला ६५वा सामना झाला. यामध्ये बंगळुरूनं हैदराबादचा ८ गडी राखून दणदणीत पराभव केला. बंगळुरूच्या विजयामध्ये माजी कर्णधार विराट कोहलीच्या शतकाचा मोठा वाटा होता. विराटच्या या शतकाच्या जोरावर हैदराबादनं दिलेलं १८६ धावांचं आव्हान बंगळुरूनं १९.२ षटकांत अवघ्या दोन विकेट्सच्या मोबदल्यात पूर्ण केलं. या विजयासह बंगळुरूनं टॉप ४ संघात स्थान मिळवलं असून आता प्रत्येक संघाचा एकेक सामना शिल्लक असताना तिसऱ्या आणि चौथ्या स्थानासाठी चुरस निर्माण झाली आहे.

सामना संपल्यानंतर विराटचा अनुष्काला व्हिडीओ कॉल!

दरम्यान, सामना संपल्यानंतर विराट कोहलीनं पत्नी अनुष्का शर्माला मैदानावरूनच व्हिडीओ कॉल केला. विराट अनुष्काशी व्हिडीओ कॉलवर बोलत असल्याचे काही व्हिडीओ सोशल मीडियावर व्हायरल झाले होते. या घटनेचे फोटोही सध्या व्हायरल होत आहेत.

अनुष्का शर्मानंही आपल्या इन्स्टाग्राम स्टोरीवर विराटच्या या विक्रमी शतकाबद्दल त्याचं अभिनंदन करणारी पोस्ट केली. “तो धमाका आहे. काय इनिंग होती ती!” असं लिहून अनुष्कानं विराटचे शतकानंतर सेलिब्रेट करतानाचे फोटो इन्स्टाग्राम स्टोरीवर शेअर केले.

दरम्यान, सामना संपल्यानंतर मैदानावरून हॉटेलवर परत येत असतानाही बसमध्ये विराट कोहली व्हिडीओ कॉलवरच बोलत असल्याचं दिसून आलं. यावेळीही विराट अनुष्काशीच व्हिडीओ कॉलवर बोलत असल्याचं सांगितलं जात आहे.

विराट आणि अनुष्का अर्थात विरुष्का हे सध्या क्रीडा आणि बॉलिवुडमधल्या सर्वाधिक चर्चेत असणारं दाम्पत्य असल्याचं पाहायला मिळत आहे.