खेलो इंडिया युवा क्रीडा स्पर्धा : गतविजेत्या महाराष्ट्रापुढे यजमान हरयाणाचे कडवे आव्हान; आजपासून खेलो इंडिया युवा क्रीडा महोत्सवाला प्रारंभ

यंदा १८६६ पदकांसाठी (५४५ सुवर्ण, ५४५ रौप्य आणि ७७६ कांस्य) ही क्रीडा स्पर्धा होणार आहे. ८५०० क्रीडापटू, मार्गदर्शक आणि पदाधिकारी या स्पर्धेसाठी येथे दाखल झाले आहेत. पंचकुला, अंबाला, शाहबाद, चंडिगढ आणि दिल्ली अशा पाच ठिकाणी २५ क्रीडा प्रकारांमध्ये ही स्पर्धा होणार आहे.

महाराष्ट्राची दोन्ही गटांत विजयी सलामी

पहिल्या दिवशी महाराष्ट्राच्या दोन्ही कबड्डी संघांनी विजयी सलामी नोंदवली. मुलांच्या संघाने आंध्र प्रदेशचा ४८-२९ असा पराभव केला, तर मुलींच्या संघाने झारखंडचा ६०-१५ असा धुव्वा उडवला. पुरुष गटात शिवम पठारे, पृथ्वीराज चव्हाण यांनी नेत्रदीपक चढाया केल्या, तर दादासाहेब पुजारी, रोहन तुपारे, साईप्रसाद पाटील, जयेश महाजन यांनी उत्कृष्ट पकडी केल्या. महिला गटात हरजीतसिंग संधूने चढायांचे ११ गुण कमावले, तर ऋतुजा अवघडीने ८ गुण मिळवले. याशिका पुजारीनेही (५ गुण) त्यांना छान साथ दिली. निकिता लंगोटे आणि कोमल ससाणे यांनी नेत्रदीपक पकडी केल्या.