भारत विरुद्ध इंग्लंड पाच कसोटी सामन्यांच्या मालिकेत भारताने १-० ने आघाडी घेतली आहे. पहिला सामना पावसामुळे वाया गेल्यानंतर दुसरा कसोटी सामना भारताने जिंकला. आता दोन्ही संघ तिसऱ्या कसोटी सामन्यासाठी सज्ज आहेत. २५ ऑगस्टपासून हेंडिग्ले मैदानात हा सामना खेळला जाणार आहे. मात्र या सामन्यापूर्वी इंग्लंडच्या संघाला धक्का बसला आहे. खांद्याच्या दुखापतीमुळे वेगवान गोलंदाज मार्क वूड सामना खेळणार नाही. दुसऱ्या कसोटी सामन्याच्या चौथ्या दिवशी क्षेत्ररक्षण करताना वूडच्या खांद्याला दुखापत झाली होती. दरम्यान मेडिकल टीमच्या देखरेखीखाली लीड्समध्ये वूड संघासोबत असणार आहे.

दुसरीकडे टी २० मध्ये जागतिक क्रमवारीत अव्वल स्थानी असलेल्या डेविड मलानचं कसोटीत पुनरागमन झालं आहे. या व्यतिरिक्त वेगवान गोलंदाज साकिब महमूदला संघात स्थान मिळालं आहे. साकिबला तिसऱ्या कसोटी संघात संधी मिळण्याची शक्यता आहे. डेविड मलानने ऑगस्ट २०१८ मध्ये शेवटचा कसोटी सामना खेळला होता. त्याने आतापर्यंत खेळलेल्या १५ कसोटी सामन्यात त्याने २७.८ च्या सरासरीने ७२४ धावा केल्या आहेत. त्यात एका शतकाचा समावेश आहे. दुसरीकडे साकिबने आतापर्यंत एकही कसोटी सामना खेळलेला नाही. पाकिस्तानविरुद्ध तीन एकदिवसीय सामन्यांच्या मालिकेत त्याने ९ गडी बाद केले होते. ही मालिका इंग्लंडने ३-०ने जिंकली होती.

इंग्लंडने संघातून जॅक क्रॉले, डॉम सिबली, जॅक लीच यांना बाहेरचा रस्ता दाखवला आहे. फलंदाज डॉम सिबली दोन कसोटी सामन्यात पूर्णपणे निष्फळ ठरला आहे. त्याने १४.२५ च्या सरासरीने फक्त ५७ धावा केल्या होत्या. लॉर्ड्समध्ये पहिल्या डावात त्याने ४४ चेंडूत ११ धावा, तर दुसऱ्या डावात त्याला खातंही खोलता आलं नाही. जॅक क्रॉलेला एका कसोटीत खेळण्याची संधी मिळाली. त्याने १६.५० च्या सरासरीने ३३ धावा केल्या होत्या. तर फिरकीपटू जॅक लीचला अंतिम अकरा खेळाडूत स्थान मिळालं नव्हतं.

तिसऱ्या कसोटीसाठी इंग्लंडचा संघ: जो रूट (कर्णधार), मोइन अली, जेम्स अँडरसन, जॉन बेअरस्टोस रोरी बर्न्स, जोस बटलर, सॅम करन, हसीब हमीद, डॅन लॉरेंस, साकिब महमूद, डेविड मलान, क्रेग ओव्हरटन, ओली पोप, ओली रॉबिन्सन, मार्क वूड