जो दिखता है, वो बिकता है!

आय-लीग स्पर्धेला जाहिराती आणि लोकप्रियतेची कमतरता जाणवत होती, ती इंडियन सुपर लीग स्पर्धेद्वारे भरून निघणार आहे. बॉलीवूड अभिनेते, क्रिकेटपटू आणि व्यावसायिकांनी फुटबॉलच्या मैदानात उडी घेतल्यामुळे आता भारतीय फुटबॉलला ‘चार चाँद’ लागणार आहेत. आय-लीगमध्ये खेळणारे खेळाडू चांगले आहेत, याची माहिती कुणापर्यंतही पोहोचत नव्हती. आता आयएसएलच्या रूपाने भारतीय फुटबॉलला नवा चेहरा मिळणार आहे. आमच्या वेळी आम्हाला भारतातील मोजकेच खेळाडू माहीत असायचे. त्यांना बघूनच आम्ही फुटबॉलकडे वळलो. आता स्थानिक खेळाडूंनाही परदेशातील अव्वल प्रशिक्षकांचे मार्गदर्शन लाभणार आहे. त्याचबरोबर त्यांना परदेशातील अव्वल खेळाडूंबरोबर खेळण्याची संधी मिळणार आहे. पायाभूत सोयीसुविधा सुधारल्यानंतर अनेक मुले फुटबॉलकडे वळतील, अशी आशा आहे. माझ्या मते, भारतीय फुटबॉलच्या उभारीसाठी हीच योग्य वेळ आहे.
– संदेश झिंगन,  मुंबई फुटबॉल क्लबचा बचावपटू

नावाजलेल्या मंडळींचा समावेश, मार्केटिंगचे नवे तंत्र आणि मनोरंजनाचा तडका देण्यात आल्यामुळे सध्या इंडियन सुपर लीगचा सध्या गाजावाजा होत आहे. आय-लीगमध्ये मोहन बागान, ईस्ट बंगाल यांसारखे अनेक दिग्गज संघ होते. पण त्यांची तितकी चर्चा होत नव्हती. हे सर्व फुटबॉलवरील प्रेमामुळे आपले अस्तित्व टिकवून आहेत. आय-लीगमध्ये मुंबईचे चार, गोव्याचे पाच, कोलकाताचे चार संघ आहेत. प्रत्येक संघाचे बजेट मर्यादित आहे. पण हे सर्व संघ एकत्र येऊन एकच संघ तयार केला तर अनेक बडे खेळाडू त्यांना विकत घेता येतील. साहजिकच भारतीय फुटबॉलचा दर्जा उंचावत जाईल. इंडियन सुपर लीगमध्ये तीन-चार जणांनी मिळून एक संघ विकत घेतला आहे. या स्पर्धेमुळे स्थानिक खेळाडूंना योग्य व्यासपीठ मिळणार आहे. तसेच तळागाळातील फुटबॉलच्या विकासालाही प्राधान्य दिले जाणार आहे. सर्व सामने प्राइम-टाइमला दाखवण्यात येणार असल्यामुळे हा खेळ भारतीय चाहत्यांमध्ये लोकप्रिय होण्यास मदत होणार आहे.         
-हेन्री मेनेझेस, विफा’चे मुख्य कार्यकारी अधिकारी