मधुमेह आहे आणि दिवाळीत गोड खाण्याचा मोह आवरत नाही का? काय सांगतात तज्ज्ञ?

आहार, औषधे आणि दिनचर्या

सणासुदीच्या काळात तुमच्या औषधांबाबत सतर्क राहणे महत्त्वाचे आहे. जर तुमच्या औषधांच्या वेळा चुकल्या किंवा ती घेणं विसरलात तर तुमच्या साखरेची पातळी बिघडू शकते. तुम्हाला सण साजरा करायचा आहे तर ते कुठल्याही त्रासाचे कारण ठरणार नाही याची काळजी घ्या.

सध्या साखरेशिवाय गोड पदार्थ खाण्याकडे लोकांचा कल आहे. अगदीच इच्छा होत असेल तर मर्यादित प्रमाणात गोड पदार्थांचे सेवन तुम्ही करू शकता. असं असताना डायबिटीज नियंत्रणात ठेवण्यासाठी तुम्ही तुमच्या दिनचर्येचे पालन करणे गरजेचे आहे आणि त्यात बदल होणार नाही याची काळजी तुम्हाला घ्यावी लागेल.

सुक्या मेव्याचे सेवन योग्य पर्याय आहे का?

जर तुम्ही सुक्या मेव्याऐवजी गोड पदार्थ खाण्याचा विचार करत असाल तर ते काही प्रमाणात योग्य आहे. कारण काजूसारखा सुकामेवा खाल्ल्याने कोलेस्ट्रॉल वाढू शकते. कमी प्रमाणात सुक्या मेव्याचे सेवन केल्याने कोणतीही समस्या उद्भवणार नाही. ड्रायफ्रुट्समध्ये चरबीचे प्रमाण जास्त असते, त्यामुळे आणखी नवीन समस्या उद्भवू शकतात.

जर एखाद्या आहारतज्ज्ञांनी किंवा पोषणतज्ज्ञांनी तुम्हाला डाएट प्लॅन दिला असेल तर त्याचे योग्य पालन करत रहा. जर तुम्ही तुमच्या दिनचर्येतील हालचाली, योगा आणि व्यायाम यामध्ये सातत्य राखले तुमचे आरोग्य उत्तम राहील. अनेकदा लोक दिवाळीच्या पार्टीमध्ये केवळ जीभेच्या चवीसाठी म्हणून अनावश्यक गोष्टी खातात. तसंच अल्कोहोलचे सेवन केल्याने कॅलरीज वाढतात. तळलेले अन्न किंवा जास्त मीठ असलेले अन्न रक्तदाबाची समस्या वाढवू शकतात. गोड किंवा तळलेले पदार्थ जरी तुम्ही खाल्ले आणि तुमची दिनचर्या व्यवस्थितपणे पाळली तरी प्रत्येक सणवार तुम्ही खाऊन-पिऊन आनंदात साजरे करू शकता.