Working Women Physical Activity: प्रत्येक वयात महिलांनी आपल्या आरोग्याकडे लक्ष द्यायला हवे. तरुणपणात महिलांना फार समस्यांना समोरे जावे लागत नाही. परंतु, जस जसे वय वाढते, तशा अनेक समस्या उद्भवायला सुरुवात होते. ३५ व्या वर्षापासून नोकरदार महिलांच्या आयुष्यातील एका महत्त्वाच्या टप्प्याला सुरुवात होते, जिथे त्यांना त्यांच्या आरोग्याच्या प्राधान्यांचे पुनर्मूल्यांकन करावे लागते. तज्ज्ञ या वयोगटातील महिलांना नोकरी सांभाळून आरोग्य सुदृढ ठेवण्यासाठी प्रोत्साहन देतात.
“३५ वर्ष वयानंतरच्या नोकरदार महिला म्हणून व्यस्त जीवनशैलीसह तुमच्या आरोग्याला प्राधान्य देणे आवश्यक आहे. निरोगी सवयी विकसित करणे आणि त्यांचे पालन करणे तुमच्या शारीरिक, मानसिक आणि भावनिक आरोग्यावर कायमस्वरूपी परिणाम करू शकते,” असे दिल्लीतील सीके बिर्ला हॉस्पिटलमधील अंतर्गत औषध विभागाचे प्रमुख सल्लागार डॉ. नरंदर सिंगला म्हणाले .
आरोग्याला प्राधान्य द्या : रक्तदाब, कोलेस्ट्रॉल, रक्तातील साखर, थायरॉईड आणि स्तनाच्या आरोग्यासह नियमित तपासणीचे वेळापत्रक तयार करा. लवकर निदान हे प्रतिबंध आणि चांगल्या परिणामांसाठी महत्त्वाचे आहे, असे हैदराबादमधील एलबीनगर येथील ग्लेनेगल्स अवेअर हॉस्पिटलच्या मुख्य आहारतज्ज्ञ डॉ. बिराली श्वेता म्हणाल्या.
डॉ. सिंगला यांच्या मते, तुमच्या प्राथमिक आरोग्य सेवा तज्ज्ञांकडे नियमित वार्षिक तपासणी केल्याने रक्तदाब आणि कोलेस्ट्रॉल पातळी यांसारख्या प्रमुख आरोग्य निर्देशकांचे निरीक्षण करण्यास मदत होते आणि संभाव्य समस्या लवकर ओळखण्यास मदत होते.
संतुलित आहार घ्या : संपूर्ण धान्य, प्रथिने, निरोगी चरबी आणि भरपूर फळे आणि भाज्या निवडा. प्रक्रिया केलेले अन्न, साखर आणि मीठ यांचे सेवन मर्यादित करा. हाडांचे आरोग्य चांगले राखण्यासाठी पुरेसे कॅल्शियम आणि व्हिटॅमिन डी घेणे अत्यंत महत्त्वाचे आहे, असे डॉ. बिराली म्हणाले.
नियमितपणे हालचाल करा : आठवड्यातून किमान १५० मिनिटे मध्यम शारीरिक हालचाली करा. स्नायूंचे प्रमाण टिकवून ठेवण्यासाठी आणि चयापचय वाढवण्यासाठी योगा क्लासेस जॉईन करा. शारीरिक आरोग्य तुमच्या दिनचर्येचा आधारस्तंभ असले पाहिजे. निरोगी वजन राखण्यासाठी, हृदय व रक्तवाहिन्यांसंबंधी आरोग्य वाढवण्यासाठी आणि ताण कमी करण्यासाठी चालणे, सायकलिंग किंवा पोहणे उत्तम आहे.
झोप आणि ताण व्यवस्थापन : ७-८ तासांच्या शांत झोपेला प्राधान्य द्या. ताण कमी करण्यासाठी योग, ध्यान किंवा श्वासोच्छवासाचे व्यायाम यांसारख्या पद्धतींचा समावेश करा.
हायड्रेटेड राहा आणि अतिउत्तेजना टाळा : कॅफिन, अल्कोहोल आणि स्क्रीन टाइम मर्यादित करा – हे सर्व झोप आणि मूडमध्ये व्यत्यय आणू शकतात.
मानसिक आणि भावनिक आरोग्य : मानसिक आणि भावनिक आरोग्याकडे कधीही दुर्लक्ष करू नये. “ध्यान, योग किंवा खोल श्वासोच्छवासाच्या व्यायामाद्वारे ताण व्यवस्थापित करा, जे तुम्हाला निरोगी काम-जीवन संतुलन राखण्यास मदत करू शकतात. भावनिक लवचिकतेसाठी एक मजबूत सामाजिक समर्थन नेटवर्क अत्यंत महत्त्वाचे असल्याने मित्र आणि कुटुंबासह अर्थपूर्ण संबंध जोपासा. स्वतःची काळजी घेण्यासाठी वेळ काढायला विसरू नका, मग तो छंदाचा आनंद घेणे असो, निसर्गात वेळ घालवणे असो किंवा फक्त स्वतःसाठी एक शांत क्षण काढणे असो,” असे डॉ. सिंगला म्हणाले.
या सवयींमध्ये सातत्य राखल्याने ऊर्जा आणि आरोग्य चांगले राहण्यास मदत होते.
याव्यतिरिक्त, काही सोप्या पण प्रभावी सवयी लक्षात ठेवा. दिवसभर भरपूर पाणी पिऊन शरीराची ऊर्जा टिकवून ठेवा आणि शारीरिक कार्यांना चालना द्या. “धूम्रपान, जास्त मद्यपान आणि जास्त साखरेचे सेवन यांसारख्या अस्वास्थ्यकर वर्तनांपासून दूर राहा,” असे डॉ. सिंगला म्हणाले.
महिलांच्या आरोग्याच्या विषयांबद्दल आणि तुमच्या कल्याणासाठी सक्षम निवडी करण्यासाठी विकसित होणाऱ्या वैद्यकीय मार्गदर्शक तत्त्वांबद्दल माहिती ठेवण्याचा प्रयत्न करा. “तुमच्या जीवनशैलीत या पद्धतींचा समावेश करून तुम्ही तुमच्या व्यावसायिक आणि वैयक्तिक जीवनातील आव्हानांना तोंड देण्यासाठी अधिक चांगल्या प्रकारे तयार असाल, तसेच तुमचे दीर्घकालीन आरोग्य आणि आनंद जोपासाल,” असे डॉ. सिंगला म्हणाले.
