Aaditya Thackeray: “उद्धव साहेबांनी प्रतिसाद दिला पण…”, राजकीय सेटिंगचा उल्लेख करत आदित्य ठाकरेंचं मोठं विधान

छत्रपती संभाजीनगरच्या दौऱ्यावर असताना आदित्य ठाकरेंनी माध्यमांशी संवाद साधला. यावेळी विविध विषयांवर त्यांनी आपले मत व्यक्त केले. ठाकरे बंधू एकत्र येण्याच्या चर्चेवरही त्यांना प्रश्न विचारण्यात आला होता. त्यावर ते म्हणाले, “उद्धव साहेबांनी प्रतिसाद दिला होता. महाराष्ट्र हितासाठी जे कुणी स्वच्छ मनाने पुढे येतील, त्यांना घेऊन पुढे जाण्यासाठी आम्ही तयार आहोत. हे उद्धव साहेबांनी सांगितले होते.”

आम्ही सेटिंगचे राजकारण करणार नाही

आदित्य ठाकरे पुढे म्हणाले, “साद-प्रतिसाद, टाळी, दुसरी टाळी हे सर्व चालूच असते. पण आम्ही महाराष्ट्राच्या हिताचे बोलत आहोत. आम्ही कुठेही सेटिंगचे राजकारण करणार नाही. आम्ही स्वच्छ दिलाने पुढे येत आहोत. जे कुणी आमच्याबरोबर येतील त्यांना घेऊन पुढे जाऊ. हे कोणत्याही एका पक्षाबाबत बोलत नाही.”

महाराष्ट्राच्या राजकारणाबाबत बोलताना आदित्य ठाकरे म्हणाले की, राज्याची अवस्था आज बिकट झाली आहे. निवडणुकीपूर्वी जी वचने दिली होती. ती पूर्ण केलेली नाहीत. सरकारमधील तीनही पक्षांमध्ये वाद सुरू आहेत. हे वाद जनतेसाठी नसून कुणाला बंगला, कुणाला पालकमंत्री हवे आहे, यासाठी वाद सुरू आहे. महाराष्ट्र हिताची एकही गोष्ट तीनही पक्षाचे नेते बोलत नाहीत, असा आरोप आदित्य ठाकरे यांनी केला.