अजित पवार सार्वजनिक कार्यक्रमांपासून दूर का राहतायत? प्रफुल्ल पटेलांनी सांगितलं मोठं कारण

अजित पावारांची काल आरोग्य तपासणी करण्यात आली. यातून अजित पवारांना डेंग्यू झाल्याचं निदान झालं आहे. पुढील काही दिवस अजित पवारांवर वैद्यकीय उपचार केले जातील. तसेच त्यांना डॉक्टरांनी विश्रांतीचा सल्ला दिला आहे. त्यामुळे पुढचे काही दिवस अजित पवार सार्वजनिक कार्यक्रमांना हजेरी लावणार नाहीत.

प्रफुल्ल पटेल यांनी एक्सवर केलेल्या पोस्टमध्ये म्हटलं आहे, अजित पवार सार्वजनिक कार्यक्रमांमध्ये सहभागी होत नसल्याबद्दल प्रसारमाध्यमांवर दाखवल्या जाणाऱ्या बातम्या पाहता मी स्पष्ट करू इच्छितो की, अजित पवारांना कालच डेंग्यू झाल्याचं निदान डॉक्टरांनी केलं आहे. पुढचे काही दिवस ते डॉक्टरांच्या देखरेखीखाली असतील. त्यांना वैद्यकीय उपचार आणि विश्रांती घेण्याचा सल्ला देण्यात आला आहे.

पटेल यांनी म्हटलं आहे की, अजित पवार हे जनतेची सेवा करण्यासाठी कटिबद्ध आहेत. ते पूर्णपणे बरे झाल्यावर त्यांचं काम सुरू करतील. बरे झाल्यानंतर ते त्यांची लोकांप्रती असलेली सार्वजनिक कर्तव्ये पूर्ण शक्तीने पार पाडतील.

हे ही वाचा >> “ब्राह्मण असल्याने मला टार्गेट केलं जातं”, फडणवीसांच्या वक्तव्यावर राऊत संतप्त होत म्हणाले, “तुमची कारस्थानं…”

पावसाळा संपल्यानंतर अनेक ठिकाणी साचलेले पाणी तसेच राहते. यामुळे डास आणि घाणीचा प्रादुर्भाव वढतो. अशा परिस्थितीत ऑक्टोबर आणि नोव्हेंबर महिन्यात अनेक संसर्गजन्य आजारांचा धोका अनेक पटींनी वाढतो. या महिन्यांमध्ये डेंग्यू या आजाराचा धोका सर्वाधिक धोका असतो. एडिस डासाची मादी चावण्याने हा रोग होतो. या आजाराने त्रस्त असलेल्या रुग्णांच्या रक्तातील प्लेटलेट्सची संख्या कमी होऊ लागते. डेंग्यू झाल्यावर रुग्णाला ताप येणे, डोळे दुखणे, अंगदुखी, भूक न लागणे, उलटी होणे अशी लक्षणे दिसतात.