“मी भाजपाची, पण पक्ष माझा नाही”, पंकजा मुंडेंच्या वक्तव्यावर ठाकरे गटाची प्रतिक्रिया; म्हणाले, “गोपीनाथ मुंडेंनाही…”

पंकजा मुंडे यांना २०१९ मध्ये विधानसभा निवडणुकीसाठी उमेदवारी नाकारण्यात आली होती. त्यावरून बरेच राजकीय तर्क-वितर्क लावले जाऊ लागले होते. स्वतः पंकजा मुंडे यांनी त्यांची नाराजीदेखील व्यक्त केली होती. आता त्यांनी त्यांच्या मनातली खदखद पुन्हा एकदा मांडली आहे. पंकजा मुंडे यांच्या वक्तव्यावर वेगवेगळ्या प्रतिक्रिया येऊ लागल्या आहेत. विधान परिषदेचे विरोधी पक्षनेते आणि शिवसेनेचे नेते अंबादास दानवे याबाबत म्हणाले, पंकजा मुंडे यांनी असं बोलून दाखवलं असेल तर ही भूमिका एकट्या पंकजाताईंची नाही. भजापाचे महाराष्ट्रातील, तसेच देशातील असे कार्यकर्ते आणि नेते आहेत ज्यांची घुसमट होत आहे, त्यांची भूमिका पंकजाताईंनी मांडली आहे.

अंबादास दानवे म्हणाले, भाजपात मोठ्या प्रमाणात कमर्शियलायजेशन आलं आहे. पंकजाताईंनी हजारो कार्यकर्त्यांची भूमिका व्यक्त केलेली असावी, असं मला वाटतं. एक दिवस पंकजाताईंना न्याय मिळेल. ज्या पद्धतीने गोपीनाथ मुंडे यांचं मराठवाड्यात आणि महाराष्ट्रात नेतृत्व होतं, त्यांनाही अशाच अनेक अडचणींना तोंड द्यावं लागलं होतं. त्या तुलनेत पंकजाताईंसमोर काहीच अडचणी नाहीत. गोपींनाथ मुंडे यांनाही असा त्रास झाला होता. मला वाटतं पंकजाताईंचा एक दिवस येईल.