“नाना पटोले आमचे प्रदेशाध्यक्ष, त्यांना गांभीर्यानं घेत नाही म्हणणं..” अशोक चव्हाणांनी संजय राऊत यांना सुनावलं

संजय राऊत आणि नाना पटोले यांच्यात काय वाद झाला?

संजय राऊत यांनी आमच्या पक्षात चोंबडेपणा करु नये ते आमच्या पक्षाचे प्रवक्ते नाहीत अशी टीका काँग्रेस प्रदेशाध्यक्ष नाना पटोले यांनी केली. राष्ट्रवादी काँग्रेस हा भाजपासोबत जाण्याची चूक करेल असं वाटत नाही. शरद पवार हे फुले, शाहू आंबेडकर यांचा विचार मानणारे आहेत. त्यामुळे ते भाजपासोबत जाणार नाहीत असा आमचा विश्वास आहे असं नाना पटोले यांनी म्हटलं तसंच संजय राऊत यांनी चोंबडेपणा करु नये. ते आमच्या पक्षाचे प्रवक्ते नाहीत असंही त्यांनी सुनावलं.

संजय राऊत यांनी नेमकं काय उत्तर दिलं?

यानंतर संजय राऊत यांनी नाना पटोलेंनी प्रत्युत्तर दिलं. नाना पटोलेंना त्यांचा काँग्रेस पक्षच गांभीर्याने घेत नाही. नाना पटोलेंपेक्षा राहुल गांधी माझ्याशी जास्त बोलतात. यावर आता अशोक चव्हाण यांनी प्रत्युत्तर देत संजय राऊत यांना सुनावलं आहे.

काय म्हणाले अशोक चव्हाण ?

तीन पक्षांची आघाडी असल्याने काहीवेळा शाब्दिक खटके उडतात. मात्र नाना पटोलेंना पक्ष गांभीर्याने घेत नाही असं म्हणता येणार नाही. नाना पटोले हे आमचे प्रदेशाध्यक्ष आहेत. तिन्ही पक्षांनी एकमेकांविषयी बोलताना काळजी घेतली पाहिजे. आम्ही टोकाला जाणार नाही अशा पद्धतीने वक्तव्यं केली पाहिजे.