नांदेड : नांदेडसह महाराष्ट्रातील काही ‘राजकन्या’ आणि इतरांना वेगवेगळे पुरस्कार देण्याच्या समारंभास उपस्थित राहण्यासाठी लंडनवारी करून आल्यानंतर पालकमंत्री अतुल सावे आणि खासदार अशोक चव्हाण यांनी तब्बल आठवडाभराने रविवारी मुखेड तालुक्यातील पूरग्रस्त गावांमध्ये फेरी मारली. या दरम्यान त्यांना लोकांचा संताप, राग आणि तक्रारींशी सामना करावा लागला.
मुखेड आणि किनवट तालुक्यांच्या काही भागांतील अतिवृष्टी आणि पूर परिस्थितीदरम्यान जिल्ह्यातील नेतृत्वहीनता ठळक झाली होती. त्यावर वेगवेगळ्या माध्यमांमध्ये चौफेर टीका झाल्यानंतर ज्येष्ठ नेते, खासदार अशोक चव्हाण दीर्घ कालावधीनंतर नांदेडमध्ये दाखल झाले. पालकमंत्री अतुल सावे यांच्यासोबत त्यांनी मुखेडमधील बाधित गावांना भेट देऊन पाहणी केली.
मागील रविवार-सोमवार दरम्यानच्या अतिवृष्टीमुळे मुखेड तालुक्यात लेंडी नदीकाठच्या रावणगाव-हसनाळ आणि इतर काही गावांना पुराचा तडाखा बसला. त्यानंतर चार-पाच दिवस पूरग्रस्तांचा आक्रोश बघायला मिळाला. या भागाची पाहणी करण्यासाठी पालकमंत्र्यांना आठ दिवसांनंतर सवड मिळाल्याच्या मुद्यावरून पूरग्रस्त भागात लोकांनी आपला राग व्यक्त केला.
मंत्री सावे रविवारी सकाळी आधी नांदेडमध्ये दाखल झाले. पूरग्रस्त भागाच्या पाहणीसाठी जाण्यापूर्वी त्यांनी अशोक चव्हाण आणि डॉ. अजित गोपछडे या खासदारद्वयींच्या उपस्थितीत एकंदर परिस्थिती तसेच मदतकार्याचा आढावा घेतला. नंतर हे नेते हसनाळ गावी मोठ्या पोलीस बंदोबस्तात पोहचले. जिल्हाधिकारी राहुल कर्डिले, पोलीस अधीक्षक अबिनाशकुमार व अन्य अधिकारी तसेच भाजपा जिल्हाध्यक्ष किशोर देशमुख या दौऱ्यात सहभागी झाले होते.
पूर परिस्थिती उद्भवल्यापासून त्या भागातील शेकडो बाधित आणि कार्यकर्त्यांनी लेंडी धरणाचे कार्यकारी अभियंता विवेकानंद तिडके यांच्यावरचा संताप सतत व्यक्त केला. मुख्यमंत्र्यांनी पाठविलेले मंत्री गिरीश महाजन यांच्याकडेही तिडकेंची तक्रार करण्यात आली. त्यांच्यामुळेच पुराचे संकट ओढवले, असे लेंडी धरण संघर्ष समितीचे म्हणणे आहे. पालकमंत्री सावे व अन्य नेत्यांसमोर रविवारी पुन्हा तिडकेंविरोधी सूर निघाल्यानंतर त्यांच्यावर कारवाई करण्यात येईल, असे सावे यांनी स्पष्ट केले. वरील विषय मागील आठ दिवसांपासून सुरू असला, तरी शासनाच्या जलसंपदा विभागाने तिडके यांना बदलले नाही. प्रशासनातील काही अधिकाऱ्यांनी तर तिडके यांची तरफदारी चालवली असल्याचे दिसून आले.
‘नांदेड जिल्ह्यावरील पुराच्या संकटाच्या काळात मी एका वृत्तपत्राच्या कार्यक्रमानिमित्त परदेशात होतो; पण जिल्ह्यातील गंभीर परिस्थितीकडे माझे लक्ष होते. जिल्हाधिकाऱ्यांशी माझा संपर्क होता. तेथून परतल्यावर मी लगेचच बाधित गावांना भेट देण्यासाठी, लोकांच्या व्यथा जाणून घेण्यासाठी आलो आहे.’-अतुल सावे, पालकमंत्री
नेत्यांच्या पूर पर्यटनावर नाराजी
पाऊस व पुरामुळे हसनाळकरांचे न भरून येणारे नुकसान झाले आहे. त्या परिस्थितीत सत्ताधारी व विरोधी नेत्यांचे पूर पर्यटन सुरू आहे. याबाबत लोकांमध्ये तीव्र संताप असल्याचे सांगण्यात आले. पुढाऱ्यांचे हे दौरे पूरग्रस्तांच्या जखमेवर मीठ चोळणारे असल्याच्या प्रतिक्रिया व्यक्त होत आहेत. दोषींची तातडीने चौकशी करून संबंधितांना अटक करावी, या मागणीकडे दुर्लक्ष होत असल्याचा ग्रामस्थांचा समज झाला आहे.
