मुक्ताईनगर शहरातील साई चौकात दुपारी एका कंटेनरखाली सापडून आठ वर्षीय बालक जागीच ठार झाला. अपघातानंतर संतप्त जमावाने कंटेनर चालकाला मारहाण केली. शुभम बोदडे (८) असे या बालकाचे नाव आहे. मूळचा बुलढाणा जिल्ह्यातील मलकापूरचा असणारा शुभम आईसोबत येथे खरेदीसाठी आला होता. औरंगाबाद-बऱ्हाणपूर मार्गावर चालकाचे नियंत्रण सुटल्याने बालक कंटेनरखाली सापडला. डोळ्यांसमोर ही घटना घडल्याने आईने हंबरडा फोडला. स्थानिक नागरिकांनी धाव घेऊन कंटेरनला अडविले आणि चालकाला चोप दिला. शहरातून महामार्ग गेल्यामुळे वारंवार अशा घटना घडत असल्याची तक्रार नागरिकांनी केली. गोपाळ पारधी यांच्या तक्रारीवरून कंटेनर चालक हरपाल टेकाचंदसिंग याच्याविरुद्ध मुक्ताईनगर पोलीस ठाण्यात गुन्हा दाखल करण्यात आला आहे.