Ajit Pawar on RR Patil: ‘पैज हरल्यामुळं आर. आर. पाटलांना द्यावी लागली होती आलिशान गाडी’, अजित पवारांनी सांगितला किस्सा

हे वाचा >> “आर. आर. पाटलांनी माझा केसानं गळा कापला, फडणवीसांनी मला…”, अजित पवारांचा धक्कादायक खुलासा

अजित पवार यांनी आर. आर. पाटील यांच्याशी निगडित मुंबईतील हल्ल्यानंतरची आठवण सांगितली. ते म्हणाले, एका पत्रकार परिषदेत आबा “बडे बडे शेहरों मे..”, हे विधान बोलून बसले आणि त्यानंतर त्यांनी माझ्याशी चर्चा न करता राजीनामा देऊन टाकला आणि गावाला जाऊन बसले. दहा – पंधरा दिवस लोक येऊन भेटत होते, मग नंतर कुणी यायला तयार झाले नाही. आबांनी मला फोन करून ही व्यथा सांगितली. मी ताबडतोब हेलिकॉप्टर पाठवून त्यांना मुंबईत आणलं आणि पक्षाचे प्रांताध्यक्षपद दिले. नंतर त्यांना पुन्हा मंत्रिमंडळात सामावून घेण्यासाठी प्रयत्न केले, असे अजित पवार म्हणाले.

पैज हरलो म्हणून नवीकोरी गाडी दिली

अजित पवार पुढे म्हणाले, २००४ साली आर. आर. आबा म्हणाले की, आपण काँग्रेसपेक्षा जास्त जागा जिंकणार. मी म्हणालो, शक्य नाही आणि शक्य झालं तर माझ्याकडून तुला नवीकोरी गाडी देईल. निकालानंतर खरंच तसं झालं. राष्ट्रवादी काँग्रेसचे जास्त आमदार निवडून आले. मी क्षणाचाही विचार न करता स्कोडा कंपनीची सुपर गाडी आबाकडे पाठवून दिली.

१९९९ साली संजयकाका पाटीलला आर. आर. पाटील यांच्या विरोधात निवडणूक लढविण्यापासून मी रोखले होते. साताऱ्यात सर्किट हाऊसला संजयकाकाला बोलावून निवडणूक अर्ज दाखल न करण्याबाबत सूचना दिल्याची आठवण अजित पवार यांनी सांगितली. तू अर्ज भरलास तर आर. आर. पाटील पडेल, असे सांगितल्यानंतर संजयकाका जगताप यांनी अर्ज मागे घेतला. त्याबदल्यात त्यांना विधानपरिषद दिली. मी शब्दाचा पक्का आहे, असेही अजित पवार यावेळी म्हणाले.