बार्शीजवळ नदीला पूर आल्याने सहा गावांचा संपर्क तुटला

आगळगावसह कळंबवाडी, भानसोळी, उमरगे आदी गावांना या पुरामुळे एकमेकांचा संपर्क तुटला आहे. बार्शीजवळील परांडा (जि. धाराशिव) येथे मुसळधार पाऊस कोसळल्यामुळे ही परिस्थिती निर्माण झाल्याचे सांगण्यात आले. चांदणी नदीला तेथील पुलावर पाणी आल्यामुळे तेथील वाहतूक बंद झाली आहे.

इकडे दक्षिण सोलापूर तालुक्यात हत्तूर येथे सीना नदीच्या काठावर असलेली बिळेणी बनसिद्ध हिरकूर यांची दीड एकर उसाची शेती संपूर्ण मातीसह वाहून गेली आहे. सीना नदीच्या काठी असलेल्या या शेतीचे नुकसान झाल्याचे काही वाटत नाही, परंतु शेतातील माती वाहून गेल्याने फार मोठे नुकसान होते, अशी प्रतिक्रिया शेतकरी बिळेणी हरकूल यांनी व्यक्त केली आहे. सीना नदीच्या पुढे आणखी काही अंतरावर हीच परिस्थिती दिसून येते.