रत्नागिरी : रत्नागिरी तालुक्यातील पोमेंडी बुद्रुक येथे जमिनीच्या खरेदी-विक्री व्यवहारातून १ लाख २० रुपयांची फसवणूक केल्या प्रकरणी संशयिताविरुद्ध ग्रामीण पोलीस ठाण्यात गुन्हा दाखल करण्यात आला आहे. ही घटना सप्टेंबर २०२३ ते ऑक्टोबर २०२५ या कालावधीत घडल्याचे फिर्यादीत नोंद करण्यात आली आहे.
मिळालेल्या माहितीनुसार, सुरेश काळ्या पवार (रा. पोमेंडी, रत्नागिरी) याच्या विरोधात फिर्यादी प्रतिभा दिनेश देशमुख (वय ४८, रा. शंखेश्वर मधुबन अपार्टमेंट, बोर्डीग रोड, माळनाका, रत्नागिरी) यांनी ग्रामीण पोलीस ठाण्यात तक्रार दिली आहे. त्यानुसार फिर्यादी आणि संशयित यांच्यात जमिन खरेदी-विक्री चे व्यवहारातून ओळख झाली होती.
सुरेश पवार याने आपल्या मालकीची जमीन आहे, असे फिर्यादी यांना सांगितले. त्यामध्ये १० गुंठे जमिनीचा व्यवहार ९ लाखाला ठरवून संशयिताने फिर्यादी यांच्याकडून टोकन म्हणून २० हजार घेतले. १० सप्टेंबर २०२३ ला जमीन खरेदी खताचे रजिस्ट्रेशन म्हणून ६० हजार व जमिन कंपाऊंड घालणे व डुरा बुजविणे ४० हजार असे एकूण १ लाख खर्च येणार असल्याचे सांगितले.
फिर्यादी यांनी स्टेट बँक ऑफ इंडिया शाखा खारेघाट रत्नागिरी या बँकेतून १ लाख रुपये २३ नोव्हेंबर २०२३ ला सुरेश पवार याच्या अकाऊंटला जमा केले. त्यानंतर जमीन विक्रीचा व्यवहार पूर्ण करण्याकरता फिर्यादी प्रतिभा देशमुख संशयिताला भेटण्यासाठी गेल्या असता तो टाळा-टाळ करु लागला. यानंतर आपली १ लाख हजार रुपयांची फसवणूक झाल्याचे लक्षात येताच प्रतिभा देशमुख यांनी ग्रामीण पोलीस ठाण्यात तक्रार दाखल केली. या तक्रारीवरुन पोलिसांनी सुरेश पवार याच्यावर गुन्हा दाखल करण्यात आला आहे.
