रत्नागिरी – रत्नागिरी जिल्ह्याच्या सागरी जलदी क्षेत्रात मोठ्या प्रमाणात पर्ससिननेट, एलईडी आणि मिनी पर्ससिनद्वारे बेकायदेशीर मासेमारी सुरू आहे. याला सागरी सुरक्षा रक्षकांचा आशीर्वाद असल्याने त्यांना नोकरीवरून काढून टाका. चार मासे मिळावे, यासाठी ते कर्तव्य बासणात गुंडाळत आहेत.
पारंपरिक मच्छीमारांच्या १० वावामध्ये मासेमारी करणाऱ्या नौका मत्स्य खात्याच्या ड्रोन कॅमेऱ्यामध्ये येतात. मग ५ वावात पर्ससिनद्वारे मासेमारी करणाऱ्या नौका का दिसत नाही, असा आक्षेप घेत यावर कारवाई झाली नाही तर आम्ही कायदा हातात घेवून कार्यालयाला टाळे ठोकू, असा इशारा शाश्वत मच्छीमार हक्क संघाचे अध्यक्ष रणजित भाटकर यांनी रत्नागिरी सहायक मत्स्य विभागाच्या अधिकाऱ्यांना दिला.
राज्याच्या जलधी क्षेत्रात म्हणजेच १२.५ नॉटीकल मैलच्या आतील समुद्रात पर्ससीन व मिनी पर्ससीनद्वारे मासेमारी होत असल्याने पारंपरिक मच्छीमारांना मासळी मिळेनाशी झाली आहे. ५ ऑक्टोबरपर्यंत धोक्याचा इशारा असल्याने पारंपरिक मच्छीमारांच्या नौका बंदरातच होत्या. या सर्व घडामोडींमुळे पारंपरिक मच्छीमार अडचणीत आला आहे. त्यात एलईडी मासेमारी, मिनी पर्ससिननेट मासेमारी मोठ्या प्रमाणात सुरू आहे. या नौकांवर कारवाई केली जात नाही. या पार्श्वभूमीवर शाश्वत मच्छीमार हक्क संघाचे शिष्टमंडळ सहाय्यक मत्स्य आयुक्त कार्यालयावर धडकले आणि अधिका-यांना याचा जाब विचारला.
रत्नागिरीतील कर्ला, राजीवडा, मिरकरवाडा, जयगड, नाटे आदी ठिकाणी मोठ्या प्रमाणात एलईडी मासेमारी सुरू आहे. या ठिकाण मत्स्य विभागाचे सागरी सुरक्षा रक्षक नियुक्त केले आहेत, परंतु ते सुरक्षेचे काम करताना दिसत नाहीत. त्यात परवाना अधिकारी नियमाने वागत नाहीत. किनार्‍यावर क्रेनने बोटीमध्ये जनरेटर चढवले जातात, एवढी मोठी क्रेन दिसत नाही का, याचा अर्थ सर्वांच्या आशीर्वादाने एलईडी मासेमारी सुरू आहे का, असे अनेक प्रश्न यावेळी उपस्थित करण्यात आले.
सुरक्षा रक्षक आपले कर्तव्य पार पाडत नसतील तर त्यांना कामावरून काढुन टाका. बोटीवाले मासे देतात म्हणून बेकायदेशीर मासेमारीकडे जाणीवपूर्वक दुर्लक्ष करत आहेत, ही गंभीर बाब असल्याचा आरोपही त्यांनी केला. पर्ससीनला परवानगी नसल्याने ट्रॉलरवर पर्ससीनचे सामान ठेवून काहीजण बेकायदा मासेमारी करीत असल्याचाही आरोप मच्छीमारांनी केला.
मत्स्य विभाग याकडे जाणिवपूर्वक दुर्लक्ष करत आहे. आता आमचा संयम ढळत चालला आहे. आम्हाला व्यवसाय बंद करण्याची वेळ आली आहे. आम्ही कायदा हातात घेतला तर कुचकामी ठरलेल्या मत्स्य विभागाला देखील टाळे ठोकू, असा इशारा देत संघाच्या पदाधिकाऱ्यांनी मत्स्य विभागाला मागण्यांचे निवेदन सादर केले.
बेकायदेशीर एलईडी, पर्ससिननेट आणि मिनी पर्ससिनेट मासेमारीबाबत आक्षेप असल्याने अशा बेकायदेशीर मासेमारीवर कडक कारवाई करण्यात येईल. – स. वि. कासेकर, प्रभारी सहाय्यक मत्स्य अधिकारी.
