राहाता : चोरट्यांच्या मारहाणीत बाप-लेकाचा मृत्यू, महिला जखमी; दोघे ताब्यात

साहेबराव पोपट भोसले (६०) व कृष्णा साहेबराव भोसले (३२) असे हत्या झालेल्या बापलेकांची नावे आहेत तर कृष्णाची आई साखरबाई साहेबराव भोसले (५५) या गंभीर जखमी झाल्या आहेत. मात्र त्यांची प्रकृती चिंताजनक आहे. दोघा संशयितांनी लाकडी दांडक्याने व फावड्याने तिघांना जबर मारहाण केली. त्यामध्ये दोघांचा मृत्यू झाला तर महिला जखमी झाली. या घटनेत घरातच असलेल्या वृद्धा गजूबाई मारुती दिघे (८०) यामात्र सुखरूप बचावल्या. त्यांना ऐकू येत नाही व दिसत नसल्यामुळे हल्लेखोरांचे त्यांच्याकडे लक्ष गेले नसावे, असा अंदाज वर्तवला जातो.

दोघा चोरट्यांनी भोसले यांच्या घरातून मोटरसायकल व मोबाइलची चोरी केली. घटनास्थळी जिल्हा पोलीस अधीक्षक राकेश ओला, अतिरिक्त पोलीस अधीक्षक वैभव कलबुर्मे, पोलीस उपअधीक्षक शिरीष वमने यांनी भेट दिली तसेच स्थानिक गुन्हे शाखेच्या पथकाला तपासाच्या सूचना दिल्या. तांत्रिक विश्लेषण व गोपनीय माहितीच्या आधारे तपास करताना गुन्हा करणारे दोन संशयित टेम्पोमधून सिन्नरमार्गे नाशिककडे जात असल्याची माहिती मिळाली. त्यानुसार पळशी टोलनाका येथे सापळा रचून, टेम्पोमध्ये पाठीमागील बाजूस बसलेल्या दोघांना ताब्यात घेण्यात आले. या शोधासाठी सिन्नर पोलीस ठाण्याचे पोलीस निरीक्षक संभाजी गायकवाड व तेथील पोलिसांनीही मदत केली.

भोसले कुटुंब हे मूळचे कोपरगाव तालुक्यातील संवत्सरचे. ते आजोळी काकडी शिवारात राहायला आलेले आहेत. त्यांची काकडी शिवारात सहा एकर शेती आहे. दुधाचा व्यवसाय आहे. घराजवळच गाईचा गोठा आहे. घरात साहेबराव, त्यांची पत्नी साखरबाई, मुलगा कृष्णा व ८० वर्षांची वृद्धा असे चौघेजण राहतात. आज सकाळी नेहमीप्रमाणे भोसले कुटुंबातील व्यक्ती दूध घालण्यासाठी न आल्यामुळे काही जणांनी वस्तीवर जाऊन पाहिले असता त्यांनाही धक्कादायक घटना निदर्शनास आली.

घराच्या बाहेर पडवीत झोपलेला कृष्णा भोसले हा खाटेवरच रक्ताच्या थारोळ्यात आढळला. त्याचा जागीच मृत्यू झाला होता. घरात त्याची आई साखरबाई व वडील साहेबराव हे दोघे जखमी अवस्थेत व रक्ताच्या थारोळ्यात पडलेले होते. दोन्ही जखमींना तातडीने लोणी रुग्णालयात उपचारासाठी नेले असता उपचार सुरू असताना साहेबराव भोसले यांचा मृत्यू झाला. साखरबाई भोसले यांची प्रकृती गंभीर आहे. प्रारंभी ही घटना चोरी, दरोडा की अन्य कोणत्या कारणाने झाली याचा संभ्रम होता. मात्र पोलिसांनी अवघ्या १२ तासांतच गुन्ह्याची उकल करत दोघांना ताब्यात घेतले.