जुगार अड्ड्यावर छापे; ४८ जण पोलिसांच्या ताब्यात

जालना शहरात अंबड रस्त्यावरील एका हॉटेलच्या वरच्या मजल्यावर जुगार अड्डा चालविण्यात येत असल्याची माहिती पोलिसांनी मिळाली होती. या ठिकाणी छापा घालून पोलिसांनी २३ जणांना ताब्यात घेतले. त्यांच्या जवळून रोख ७५ हजार रुपये जप्त करण्यात आले. या अड्ड्यावर जुगार खेळताना रोख पैशांऐवजी त्या किंमतीच्या ‘टोकण’ चा वापर करण्यात येत होता. जालना शहरातील रहेमानगंज भागातील एका घराच्या वरच्या मजल्यावर छापा घालून पोलिसांनी जुगार खेळणाऱ्या अकरा जणांना ताब्यात घेतले. भरवस्तीतील घरामध्ये वरच्या मजल्यावर गोलाकार बसून तेथे ‘तिर्रट’ जुगार चालू असल्याचे पोलिसांच्या छाप्यात आढळून आले.

या प्रकरणी पोलिसांनी ४४ लाख ३४ हजार हजार रुपयांचा मुद्देमाल जप्त केला. त्यामध्ये चार मोटार सायकली, अकरा मोबाईल आणि रोख सतरा हजार रुपयांचा समावेश आहे. मंठा तालुक्यातील गेवराई आणि शिरपूर येथेही पोलिसांनी जुगार खेळ‌णारांच्या विरोधात कारवाई केली. गेवराई येथे पोलिसांनी अकरा जणांना ताब्यात घेतले. तर शिरपूर येथे पाच जणांना ताब्यात घेतले. दोन्ही ठिकाणच्या छाप्यात पोलिसांनी १ लाख ११ हजार रुपयांचा मुद्देमाल जप्त केला. याप्रकरणी पोलिसांनी महाराष्ट्र जुगार प्रतिबंधक कायद्यान्वये गुन्हे नोंदविले आहेत.